आँबुखैरेनी, २५ फागुन । तनहुँको आँबुखैरेनी गाउँपालिकाको वडा नं. ४ र ५ अन्तर्गत त्रिशुली नदीको तिरैतिर मुग्लिन पुलजिप हुदै घुमाउने पुग्ने मोटरमार्गको डिपिआरको काम र आँबुखैरेनी बजार हुदै छिम्केश्वरी जाने मोटरमार्ग कालोपत्रे काम आफ्नै विशेष पहलमा भएको गण्डकी प्रदेशका पूर्व आन्तरीक मामिला तथा कानुनमन्त्री हरि बहादुर चुमानले बताएका छन्। तनहुँको आँबुखैरेनी ४ स्थित खस्राङबेसीमा निर्माण हुन लागेको जलदेवि मन्दिरको शिलान्यास कार्यक्रमलाई आज सम्बोन्धन गर्दै उनले यस्तो बताएको हो।

‘मेरै कार्यकालमा मैले नै विशेष पहल गरेर प्रदेश सरकार मार्फत मुग्लिन पुलजिप हुदै घुमाउने पुग्ने मोटरमार्गको डिपिआरको काम र आँबुखैरेनी बजार हुदै छिम्केश्वरी जाने मोटरमार्ग कालोपत्रे कामको लागि करोडौं रुपैयाँको बजेट व्यवस्था गरेको हुँ, कसैले जस लिन नखोजे हुन्छ’ –उनले भने।

मन्दिर निर्माण व्यवस्थापन समितिको अध्यक्ष प्रेम गुरुङको अध्यक्षतामा सम्पन्न शिलान्यास कार्यक्रमको प्रमुख अतिथि गण्डकी प्रदेशका पूर्व आन्तरीक मामिला तथा कानुनमन्त्री हरि बहादुर चुमान रहनुका साथै कार्यक्रममा माओवादी केन्द्रका स्थानीय नेता गंगाराम कोइराला, बिमल बाबु राना, राजु गुरुङ लगायतको सहभागिता रहेको थियो।

सामाजिक विकाश मन्त्रालय गण्डकी प्रदेशको ५ लाख रुपैयाँ बजेटमा आँबुखैरेनी गाउँपालिका वडा नं. ४ र ५ को सिमास्थल खस्राङबेसीमा निर्माण हुन लागेको जलदेवी मन्दिर सो आसपासका स्थानीयहरुको पूरानो आस्थाको केन्द्र हो। स्थानीयका अनुसार परापूर्वकालदेखि नै उक्त स्थानमा पूजाआजा हुने गरेको थियो । संरक्षणको अभावमा भग्नावेश बनेको मन्दिरलाई पछिल्लो समय स्थानीयकै सक्रियता पुनःनिर्माण गर्न लागिएको हो।