प्रधानमन्त्री केपी शर्मा ओलीले मन्त्रीमण्डल पुर्नगठनको तयारीमा लागेका छन्। पार्टी भित्रको आन्तरिक समिकरण मिलाउन प्रधानमन्त्री ओलीले मन्त्रीमण्डल पुर्नगठनको तयारी गरेका हुन्।

अब हुने मन्त्रीमण्डल पुर्नगठनमा दुईजना उपप्रधानमन्त्री थप्ने तयारी उनको छ । जसमा दुई जना सचिवालय सदस्यको चर्चा छ।

वामदेव गौतम र नारायणकाजी श्रेष्ठ नेकपाको उपल्ल्लो तहबाट मन्त्रीमण्डलमा सहभागी हुन लागेका हुन्।

प्रधानमन्त्री ओलीले यसअघि नै पार्टी उपाध्यक्ष वामदेव गौतमलाई राष्ट्रियसभामा मनोनित सदस्य बनाएर उपप्रधानमन्त्रीसहित महत्वपूर्ण मन्त्रालय दिने प्रस्ताव गरिसकेका छन् ।

गौतमलाई आफूपछि वरियतामा पहिलो स्थानमा राखेर ओलीले सरकारमा लैजान लागेका हुन् । उनलाई अर्थ मन्त्रालय दिने योजनामा प्रधानमन्त्री ओलीको छ  ।

राष्ट्रियसभा सदस्यमा राष्ट्रपतिले मनोनयन गर्ने एउटा सिट बाँकी छ । सोही कोटामा पार्टी उपाध्यक्ष वामदेवलाई राष्ट्रियसभा सदस्य बनाउने नेकपाले निर्णय गरिसकेको छ ।

उनलाई राष्ट्रपति विद्यादेवी भण्डारीले आउँदो हप्ता मनोनयन गर्ने र त्यस लगत्तै नारायणकाजीसँगै मन्त्रीको सपथ लिनुहुने बताइएको छ ।

उता नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठलाई पनि उपप्रधानमन्त्रीका लागि प्रस्ताव गरिएको छ । नेकपाका अर्का अध्यक्ष पुष्पकमल दाहाल प्रचण्डको कोटाबाट श्रेष्ठको नाम प्रस्ताव भएको हो ।

श्रेष्ठ राष्ट्रियसभा सदस्य रहेका छन् । उनलाई गृह मन्त्रालयको जिम्मा दिने बारे छलफल चले पनि कुनै टुङ्गो लागेको छैन। उनले महत्वपूर्ण मन्त्रालय पाउने बताइएको छ ।

उनलाई वरियतामा प्रधानमन्त्रीपछिको स्थानमा दिनुपर्ने विषय पनि चर्चामा छ ।