नेपालमा उपचारको पहुँचमा पुगेका ७० प्रतिशत क्यान्सर पीडित बालबालिका निको

सिआईएन

४, फाल्गुण २०७८

सजना तिमल्सिना, काठमाडौंँ, ४ फागुन । नेपालमा उपचारको पहुँचमा पुगेका७० प्रतिशत क्यान्सर पीडित बालबालिका निको हुने गरेका छन् । तर आर्थिक अभाव र क्यान्सरको उपचार महङ्गो हुने भएकाले कतिपय अभिभावकले बालबालिकालाई उपचार गराउन पाएका छैनन् ।

ओखलढङ्गा घर भइ ललितपुर नखिपोट बस्दै आउनुुभएका लक्ष्मी रोकाले आफ्नो भतिजीमादेखिएको क्यान्सर उपचारपछि भने निको भएको बताउनुभयो । बालबालिकालाई जन्मजात वा पछि गएर पनि क्यान्सर हुने सम्भावना रहन्छ ।

बारम्बार ज्वरो आउनु, ज्वरो आएपछि तत्काल निको नहुनु बालबालिकामा देखिने क्यान्सरको मुख्य लक्षण रहेको बाल क्यान्सर रोग विशेषज्ञ सुचरित तुलाधरले बताउनुभयो । काठमाडौँको कान्ति बाल अस्पतालमामात्रै वार्षिक औषत दुई सय बालबालिकामा क्यान्सर देखिने गरेको र हाल करिव एक हजार पुराना विरामीले उपचार गराइरहेको अस्पतालका निर्देशक डा. अजित रायमाझीले बताउनुभयो ।

अस्पतालमा उपचार गराउन पुगेका मध्ये २० देखि ३० प्रतिशत बालबालिकाका अभिभावक गरिवीका कारण उपचार नगरीकनै छोडेर जाने गरेका छन् । विशेषगरी बालबालिकामा रगत, बोनम्यारो लगायतका क्यान्सर बढी देखिने गरेको छ ।

स्वास्थ्य, शिक्षा लगायतका विषय मौलिक अधिकारमा पर्ने भएका कारण सरकारले बालबालिकामा देखिने क्यानसरको उपचारमा पनि सहयोग बढाउनुपर्ने अभिभावक र अस्पतालहरूको माग छ ।