सीता शर्मा, काठमाडौँ, २० पुस । यसअघि बनाइएका अधिकांश भौतिक संरचना बन्द भएपछि कोरोना नियन्त्रण गर्न सकिन्न कि भन्ने चिन्ता थपिएको छ । नेपालमा पनि ओमिक्रोन अर्थात कोरोनाको तेस्रो लहर देखिएको छ भने माघको दोस्रो साता यसले महामारीको रुप लिनसक्ने सरकारको आँकलन छ । तर कोरोनाको दोस्रो लहर नियन्त्रण गर्न बनाइएका भौतिक संरचना बन्द गरिएको छ । झापाको बिर्तामोड नगरपालिकाले कोरोनाको दोस्रो लहरका बेला बनाएको ५५ शैयाको आइसोलेसन कक्ष र मेची आँखा अस्पताल परिसरमा बनाइएको आइसोलेसन कक्ष बन्द भएको नगर प्रमुख धुव्र कुमार शिवाकोटीले बताउनुभयो । 

त्यसैगरि डोटीको दिपायल सिलगढी नगरपालिकाले बनाएका सबै क्वारेन्टाइनस्थल र आइसोलेन कक्ष पनि हटाइएको नगर उपप्रमुख शिव कुमार खड्काले जानकारी दिनुभयो । स्थानीय तहले मात्रै नभइ कोरोनाको पहिलो र दोस्रो लहरका बेला प्रदेश र सङ्घ सरकारमार्फत अस्थायी अस्पताल बनाइएको थियो । काठमाडौँको निजामती कर्मचारी अस्पतालमा कोरोना सङ्क्रममितका लागि ५० शैयाको सुविधासम्पन्न अस्पताल बनाएपनि अचेल त्यहाँ अरु बिरामीलाई राख्न थालिएको अस्पतालका कोरोना फोकल पर्सन डा. विदेश विष्टले बताउनुभयो । 

अहिले देशभर २ हजार ७ सय २६ आइसियु, १ हजार ८९ भेन्टीलेटर र ३ हजारको हाराहारीमा एचडीयू सुविधाका शैया छन् । सेती प्रादेशीक अस्पताल सुदु्रपश्चिमले भने कोरोनाको तेस्रो लहरको जोखिमलाई ध्याद दिँदै पुराना संरचनालाई यथावत राखेको अस्पतालका सूचना अधिकारी दिलिप कुमार श्रेष्ठले जानकारी दिनुभयो । कोरोनाको पहिलो लहरका बेला जम्मा ६ हजार अक्सिजन सिलिन्डर नेपालमा थिए भने अहिले अस्पतालहरूसँग दैनिक ७ हजारभन्दा धेरै सिलिन्डर उपलब्ध गराउने क्षमता छ । १८ हजारभन्दा धेरै अक्सिजन सिलिन्डर व्यवसायीहरूसँग छन् । 

कोरोनाको तेस्रो लहरको जोखिम बढेकाले तयारी अवस्थामा रहन भनिएको स्वास्थ तथा जनसंख्या राज्यमन्त्री भवानी प्रसाद खापुङले बताउनुभयो  । कोरोनाको पहिलो लहरमा ३० वटा अक्सिजन पलान्ट नेपालमा थिए । अहिले सातै प्रदेशका अस्पतालमा गरी ७६ वटा जडान गरिएको स्वास्थ्य मन्त्रालयको भनाइ छ ।