आँबुखैरेनीमा संचालित एकता साकोसको तेस्रो वार्षिक साधारण सभा सम्पन्न, खुद मुनाफामा १३७ प्रतिशत वृद्वि

इच्छाकामना न्युज

१०, पौष २०७८

आँबुखैरेनीमा संचालित एकता साकोसको तेस्रो वार्षिक साधारण सभा सम्पन्न, खुद मुनाफामा १३७ प्रतिशत वृद्वि

आँबुखैरेनी, १० पुस । तनहुँको आँबुखैरेनी गाउँपालिकामा संचालित एकता बचत तथा ऋण सहकारी संस्थाको तेस्रो वार्षिक साधारण सभा सम्पन्न भएको छ । माई छिम्केश्वरी पार्टी प्यालेसमा शनिबार सहकारी संस्थाको साधारण सभा सम्पन्न भएको हो ।
आँुबखैरेनी गाउँपालिकाका अध्यक्ष गिर बहादुर थापाको प्रमुख आतिथ्यता तथा संस्थाका अध्यक्ष बाबुराम देवकोटा सभापतित्वमा सभा सम्पन्न भएको हो ।

सभामा प्रगति प्रतिवेदन प्रस्तुत गर्दै संस्थाले आर्थिक वर्ष २०७७।०७८ मा गतवर्ष भन्दा यस आवमा मुनाफामा उल्लेख्य मात्रामा वृद्वि गर्न सफल भएको अध्यक्ष बाबुराम देवकोटाले बताए । प्रतिवेदन अनुसार सहकारीले यस वर्ष झण्डै १३७ प्रतिशत भन्दा बढिले मुनाफामा वृद्वि गर्न सफल भएको छ ।

सहकारीले गत वर्ष १३ लाख ३३ हजार २ सय ७३ रुपैयाँ नाफा आर्जन गर्न सफल भएकोमा आव २०७७।०७८ मा ३१ लाख ६६ हजार १ सय ८० रुपैयाँ खुद मुनाफा आर्जन गर्न सफल भएको छ ।

संस्थाको साधारणसभा कार्यक्रममा उत्कृष्ट वचतकर्ता, ऋणी, कर्मचारीहरुलाई सम्मान गरिएको थियो भने आँबुखैरेनी १ सत्रसयका मृगौला पिडित अमृत सुनारलाई नगद ५ हजार समेत सहयोग गरिएको थियो ।

सभामा सहभागीहरुलाई संस्थाका उपाध्यक्ष शर्मिला घलेले स्वागत मन्तव्य मार्फत स्वागत गरेका थिए भने कार्यक्रमको संचालन संस्थाका सचिव गोविन्द प्रसाद खनालले गरेका थिए ।