आँबुखैरेनी, १० असोज । तनहुँको आँबुखैरेनीमा पहिलो फुटसल सञ्चालनमा आएको छ । सोही ठाउँ निवासी दुई युवाको लगानीमा आँबखैरेनी गाउँपालिका(३ पाउरोटी भण्डार हमालचोकमा आँबुखैरेनी फुटसल फुटसल सञ्चालनमा आएको हो ।

प्रताप कार्की र प्रविन रानाले ८० लाखको लागतमा फुटसल सञ्चालन गरेका हुन् । जग्गा लिजमा लिएर एक वर्षको अवधिमा संरचना तयार गरी फुटसल शुरु गरिएको सञ्चालक प्रताप कार्कीले जानकारी दिए ।

आँबुखैरेनीमा खेलमैदानको अभाव भएको र फुटबलप्रति आकर्षण बढेका कारण फुटसल मैदान तयार गरिएको कार्कीले बताए । “बजार बाक्लिदै जाँदा मैदान अभाव छ, फुटबलप्रति युवाहरुको आकर्षण बढ्दो छ, स्वास्थ्यलाई समेत ध्यानमा राखी फुटसल शुरु गरेका हौ,” उनले भने । अहिलेका युवाहरु नेपालमा भन्दा वैदेशिक रोजगारीका लागि विदेशिने प्रचलन रहेपनि आफूहरु भने नेपालमै केही गरौं भन्ने सोच सहित फुटसल शुरु गरिएको उनको भनाई छ ।

फुटसलमा पाँच ए साइड खेल खेल्न मिल्नेछ । त्यसमा दुई टिम गरी दश जना खेल्न मिल्छ । त्यसका लागि बिहान १० बजेसम्म एक खेलको एक हजार पाँच सय, दिउँसो ४ बजेसम्म एक हजार र ४ बजेपछि एक हजार पाँच सय शुल्क तोकिएको छ ।

नेपाली काङ्ग्रेस आँबुखैरेनी गाउँ समितिका सचिव दिनेश केसीले फुटसलप्रति युवाहरुको आकर्षण बढेको बताए । “फुटसल खेल्नका लागि मात्र होइन, स्वास्थ्यका लागि पनि आवश्यक छ,” उनले भने, “यस क्षेत्रमा फुटसल एकदमै आवश्यक थियो ।”

फुटसल भनेको ुमिनीु फुटबल हो । यसको मैदान ४० मिटर लामो र २० मिटर चौडा हुन्छ । नियम सबै फुटबलसँग मिल्दाजुल्दा देखिए पनि केही फरक छन् । फाउल, फ्रिकिक, पेनाल्टी, रातो र पहेंलो कार्ड सबै फुटबलका नियमसँग मिल्छन् । यसमा ६ मिटर टाढाबाट पेनाल्टी हानिन्छ । गोलरक्षकलाई ब्याक पास दिन पाइँदैन । बल नियन्त्रणमा लिएपछि गोलरक्षकले पाँच सेकेण्डभन्दा बढी समय बल ुहोल्डु गर्न पाउँदैन । खेलाडीले रातो कार्ड पाएको दुई मिनेटपछि अर्को खेलाडी मैदान प्रवेश गर्न पाउँछ ।

यो खेल सन् १९३० मा उरुग्वेका जुहान कार्लोस सेरियानीले शुरु गरेको इतिहास छ । उरुग्वेको स्थानीय भाषामा यसलाई ‘फुटोबल डे सालोनाु भनिन्थ्यो । फुटबलको नियमलाई आधार मानेर सेरियानीले फुटसलको नियम समेटेर नियम पुस्तिका प्रकाशन गरे । सन् १९३० को पहिलो फुटबल विश्वकप जितेपछि उरुग्वेमा फुटसल खेल्न थालिएको हो ।