कोरोना सङ्क्रमणको अवस्था स्थिर, जोखिम कायमै रहेको विज्ञको भनाइ

सिआईएन

१८, भाद्र २०७८

कोरोना सङ्क्रमणको अवस्था स्थिर, जोखिम कायमै रहेको विज्ञको भनाइ

स्नेहा कर्ण, काठमाडौँ, १८ भदौ । सरकारले नियमित सार्वजनिक गर्ने कोरोनासम्बन्धी तथ्याङ्क अनुसार नेपालमा केही हप्तादेखि कोरोना सङ्क्रमणको अवस्था स्थिर छ । यसैका आधारमा काठमाडौँ उपत्यकासहित देशका अधिकांश क्षेत्रको निषेधाज्ञा हटाइएको छ । तर पनि सङ्क्रमणको जोखिम कम नभएको हुनाले सावधानी अपनाउन विज्ञहरुले सुझाव दिइरहेका छन् ।

पर्वतका जगनाथ शर्माले कोरोनाविरुद्धको खोपको दुबै मात्रा लगाइसक्नुभयो । जोखिम कायमै रहेको ठानेर उहाँ स्वास्थ्य सावधानी भने अपनाइरहनुभएको छ । जनकपुरका विश्वनाथ साहलाई भने कोरोनाविरुद्धको खोपको दुबै मात्राले जोखिम कम होला कि भन्ने आशा जगाएको छ ।कोरोनाविरुद्धको खोपलाई कोरोना महामारीबाट जोगिने एक मात्रै विकल्प ठानिएको छ ।

सरकारले पनि कुल जनसङ्ख्याको २० प्रतिशत नागरिकलाई खोप लगाउने लक्ष्य लिएकोमा १५ प्रतिशत लक्ष्य पूरा भइसकेको छ । खोप लगाउने क्रमले तिव्रता पाए पनि जोखिम भने कायमै रहेको सङ्क्रामक रोग विशेषज्ञ डा.विराज कर्माचार्यको भनाई छ । कोरोना सङ्क्रमणको जोखिम कम हुँदै गएको तर्कसहित सरकारले सबै क्षेत्र खुला गर्ने रणनीति बनाएको छ ।

विभिन्न चाडपर्व नजिकिँदै गर्दा बजारमा भीडभाड बढेको छ । घरबाट निस्कनुको कारण दुवै खोपको मात्रा लगाइसकेको ठान्नेहरूसँग विज्ञ भने सहमत छैनन् । सरकारले सबै क्षेत्रको जनजीवन सामान्य बनाउने उद्धेश्यले हरेक क्षेत्रलाई खुकुलो बनाउँदै लगेको छ । तर जथाभावी भीडभाड गर्ने र जनस्वास्थ्यका मापदण्ड पालना नगर्ने हो भने कोरोनाले महामारीको रुप लिने विज्ञहरुको चेतावनी छ ।