कुलमान घिसिङद्वारा पदभार ग्रहण, दोस्रो इनिङ आफ्नो जीवनकै ठूलो चुनौती भएको भनाई

इच्छाकामना न्युज

२७, श्रावण २०७८

कुलमान घिसिङद्वारा पदभार ग्रहण, दोस्रो इनिङ आफ्नो जीवनकै ठूलो चुनौती भएको भनाई

काठमाण्डौ, २७ साउन । कुलमान घिसिङले नेपाल विद्युत् प्राधिकरणको कार्यकारी निर्देशकका रुपमा पदबहाली गर्नुभएको छ । चार वर्षे कार्यकाल पूरा गरेर अवकाश पाउनुभएका घिसिङ १० महिनापछि पुनः कार्यकारी निर्देशक नियुक्त हुनुभएको हो । घिसिङलाई चार वर्षका लागि नियुक्त गरिएको छ ।

यस्तै, प्राधिकरणका कार्यकारी निर्देशक रहेका हितेन्द्रदेव शाक्यलाई जल तथा ऊर्जा आयोगमा कार्यादेश सहित विशिष्ठ श्रेणीको पूर्णकालीन सदस्यका रुपमा नियुक्त गरिएको छ । सोमबार बसेको मन्त्रिपरिषद्को बैठकले घिसिङलाई कार्यकारी निर्देशकमा नियुक्त गर्ने र शाक्यलाई जल तथा ऊर्जा आयोगमा पठाउने निर्णय गरेको थियो ।

गत भदौमा कार्यकाल सकिएपछि नागरिकस्तर बाट घिसिङको पुनः नियुक्तिका लागि आग्रह गरिए पनि तत्कालीन केपी ओली नेतृत्वको सरकारले घिसिङलाइ अवकाश दिएको थियो । शेरबहादुर देउवा नेतृत्वको सरकारले देशको ऊर्जा क्षेत्रमा चमत्कारिक परिवर्तन गर्ने लक्ष्यका साथ घिसिङलाई जिम्मेवारी दिएको ऊर्जा, जलस्रोत तथा सिँचाइ मन्त्रालयले जानकारी दिएको छ ।

नवनियुक्त कार्यकारी निर्देशक घिसिङले निवर्तमान कार्यकारी निर्देशक हितेन्द्रदेव शाक्यलाई धन्यवाद दिनुभएको छ । कार्यकारी निर्देशक घिसिङले दोस्रो इनिङ आफ्नो जीवनकै ठूलो चुनौती भएको बताउनुभयो ।