विद्युत् प्राधिकरणमा नियुक्त कुलमान घिसिङले आजदेखि कार्यभार सम्हाल्दै

इच्छाकामना न्युज

२७, श्रावण २०७८

विद्युत् प्राधिकरणमा नियुक्त कुलमान घिसिङले आजदेखि कार्यभार सम्हाल्दै

काठमाडौं, २७ साउन । नेपाल विद्युत् प्राधिकरणको कार्यकारी निर्देशक नियुक्त भएका कुलमान घिसिङले आजबाट जिम्मेवारी सम्हाल्दै छन ।

यसअघि ४ वर्षे कार्यकाल पूरा गरी बिदा भएका घिसिङलाई देउवा सरकारले पुनः विद्युत् प्राधिकरणको कार्यकारी निर्देशक पदमा नियुक्ति दिएको हो।

‘आज म पदबहाली गर्दैछु,’ आज बिहान नागरिक खबरसंग संक्षिप्त कुरा गर्दै घिसिङले भने, ‘११ महिनापछि म विद्युत् प्राधिकरणमा पुनः फर्किंदै छु।’

ऊर्जा जलस्रोत तथा सिँचाइमन्त्री पम्फा भुसालले सोमबार मन्त्रिपरिषद् बैठकमा पेस गरेको प्रस्तावअनुसार सरकारले घिसिङलाई नेपाल विद्युत प्राधिकरणको कार्यकारी निर्देशकमा पुनःनियुक्त गरेको हो ।

मन्त्री भुसालकै प्रस्तावअनुसार यसअघिका प्राधिकरणका कार्यकारी निर्देशक हितेन्द्रदेव शाक्यलाई जल तथा ऊर्जा आयोगमा पठाइएको छ। शाक्यलाई प्राधिकरणमा खाईपाई आएको तलब सुविधा दिनेगरी आयोगमा पठाउने प्रस्ताव गरिएको हो।

शाक्यले प्राधिकरणबाट हिजै बिदा लिइसकेका छन्।

यसअघिको कार्यकालमा घिसिङले नै लोडसेडिङ समस्या सधैंका लागि अन्त्य गरी घाटामा रहेको प्राधिकरणलाई नाफा गर्न सक्ने अवस्थामा पुर्याएका थिए । यही कारण घिसिङको पुनःनियुक्तिपछि आम जनता खुसी भएका छन्। कतिपय स्थानमा खुसियालीमा दीपावलीसमेत गरिएको खबर आएको छ ।