गोरखा, २२ श्रावण ।
गोरखा अस्पतालले आफ्नो वेभसाइटबाट गलत सूचना संप्रेषण गरेको छ । डब्लुडब्लुडब्लु डट गोरखाअस्पताल डट जीओभी डट एनपी नामको वेभसाइटबाट आफ्नो ठेगाना तथा सम्पर्क नम्बर नै गलत संप्रेषण गरेको हो ।
हामीलाई सम्पर्क गर्नुहोस् भन्ने मुख्य पेजमा नै अस्पताल १२ किलोग्राममा रहेको उल्लेख छ । त्यस्तै अस्पतालको सम्पर्क नंबर ०६२४२०९१८ प्रकाशित छ ।
गोरखा नगरपालिका ६ पाटेचौर, बोसेपानी क्षेत्रमा रहेको गोरखा अस्पतालको ठेगाना १२ किलोग्राममा रहेको उल्लेख भएको हो । त्यस्तै ०६४४२०९१८ हुनुपर्नेमा सम्पर्क नंबर पनि गलत संप्रेषण गरिएको छ ।
अस्पतालको वेभसाइटको पहिलो पेजमा अस्पतालको हालको तस्वीर र हाम्रो अस्पतालमा स्वागत छ लेखिएको छ । त्यहाँ अस्पतालको परिचय, मेडिकल सुपरिटेण्डेण्टमा हालकै मेसु शान्ति भुर्तेलको नाम र अस्पताल व्यवस्थापन समितिका हालका अध्यक्ष वुद्धि दवाडीकै नाम उल्लेख छ ।
तर हाम्रो बारेमा भन्ने पेजमा मेडिकल सुपरिटेण्डेण्टमा डाक्टर नवीन थापाको नाम र व्यवस्थापन समितिको अध्यक्षमा पुरुषोत्तम अर्यालको नाम उल्लेख गरिएको छ ।
तत्कालीन मेसु डाक्टर नवीन थापाको सरुवा भएर मेडिकल सुपरिटेण्डेण्टको जिम्मेवारी डाक्टर शान्ति भुर्तेलले सम्हालेको पनि पाँच महिना भन्दा धेरै भइसकेको छ । अध्यक्ष परिवर्तन भएको पनि दुई महिना बितिसकेको छ ।
अस्पतालको वेभसाइटमा गलत सूचना रहेको बारे आफू अनभिज्ञ रहेको अस्पताल मेनेजर लिपासा श्रेष्ठ बताउँछिन् । ‘यो पेज अपडेट गर्ने काम त म आफैले गर्ने हुँ । तर ठेगाना र सम्पर्क नम्बर गलत भएको बारे जानकारी भएन’, उनले भनिन्, ‘म आउनु भन्दा अघि नै बनिसकेको थियो । म सच्याउन लगाउँछु ।’
स्रोतः दरौदी दैनिक