इच्छाकामना गाउँपालिकाले अर्को पनि नयाँ एम्बुलेन्स खरिद गर्ने

वडा नं. १ र २ का नागरिकहरुको लागि सेवा दिने गरि हात्तिवाङबाट संचालन गरिने

इच्छाकामना न्युज

१८, श्रावण २०७८

कुरिनटार, १८ साउन । चितवनको इच्छाकामना गाउँपालिकाले अर्को पनि नयाँ एम्बुलेन्स खरिद गर्ने भएको छ। यसका लागि गाउँपालिकाले आर्थिक वर्ष २०७८/७९ को बजेट निति तथा कार्यक्रममा समावेश गरेको छ।

विशेष गरेर गाउँपालिकाको माथिल्लो भेग वडा नं. १ र २ का नागरिकहरुको लागि सेवा दिने गरि नयाँ एम्बुलेन्स खरिद गर्न लागिएको गाउँपालिका अध्यक्ष गीता कुमारी गुरुङले जानकारी दिए। अध्यक्ष गुरुङका अनुसार अब ल्याउन लागिएको एम्बुलेन्स हात्तिवाङबाट संचालन गरिने र त्यस आसपासका गाउँहरुका नागरिकहरुलाई सेवा उपलब्ध गराईनेछ।

गाउँपालिका भित्र रहेका अधिंकाश एम्बुलेन्सहरु बजार क्षेत्रमा मात्र संचालनमा रहेको र पहाडी क्षेत्रहरुमा पर्ने ती गाउँहरुमा बिरामी लिनका लागि जान गाह्रो मान्ने, नजाने, आपतकालिन बिरामीहरु लिन जादा ढिलाई हुने लगायतका समस्याहरुलाई मध्यनजर गर्दै गाउँपालिकाले गाउँबाटै संचालन गर्र्ने गरी नयाँ एम्बुलेन्स ल्याउन लागेको अध्यक्ष गुरुङले बताए। उनले भने– ‘यहि आर्थिक वर्ष भित्र नयाँ एम्बुलेन्स खरिद गरिनेछ।’

गाउँपालिकाले खरिद गर्ने नयाँ एम्बुलेन्स आएपछि गाउँपालिकाको नाममा २ वटा एम्बुलेन्स हुनेछ। यस अघि गाउँपालिकाले खरिद गरिएको एउटा एम्बुलेन्स भरतपुरमा दुर्घटनामा परि ७ महिनादेखि मर्मतका लागि ग्यारेजमै राखिएको छ।