विनोद शर्मा, सीआईएन, काठमाडौं, १५ असार । सरकारलाई कोरोनाको दोस्रो लहर सुरु भएसँगै दातृ निकायबाट एक सय ३७ भेन्टिलेटर र ३५ सय भन्दाबढी अक्सिजन कन्सन्ट्रेटर प्राप्त भएका छन् । तर ६ सय भन्दा बढी अक्सिजन कन्सन्ट्रेटर र ६७ वटा भेन्टिलेटर सरकारकै गोदाममा थन्किएका छन् भने अस्पतालमा पुगेका भेन्टिलेटर पनि प्रयोगविहीन छन् ।  

जिल्ला अस्पताल सिराहामा गएको बैशाखमा ४ वटा भेन्टिलेटर जडान गरियो । तर विशेषज्ञ जनशक्ति नभएका कारण ४ वटै भेन्टिलेटर प्रयोगमा आउन सकेन । दोस्रो लहर केही मत्थरको जस्तो देखिँदै गर्दा तेस्रो लहरको चर्चा छ । महत्वपूर्ण उपकरण थन्किएपछि चिकित्सकहरु नै चिन्तामा छन् । मेडिकल अधिकृत डा. विनय प्रभाकर राई जनशक्ति अभाबले सामानहरु प्रयोग गर्न नसकिएको बताउनुभयो ।

कञ्चनपुरको महाकाली प्रादेशीक अस्पतालमा १५ वटा भेन्टिलेटर छन् । त्यसमध्ये ४ वटा विरामीसँगै यताउता लैजान मिल्छ । ३ वटा जगेडामा राखिएको छ । १० वटा भेन्टिलेटर प्रयोगमा आए पनि चलाउन सक्ने जनशक्ति अभाव रहेको अस्पतालका सूचना अधिकारी नारद प्रसाद भट्ट बताउँनुहुन्छ ।  

कोरोना महामारीको पहिलो लहरको बेला प्राप्त भएका २ सय ८ भेन्टिलेटर र सरकारले किनेको २२ वटा समेतलाई गन्ने हो भने अहिलेसम्म झण्डै ४ सय भेन्टिलेटर सरकारसँग छन् । त्यसमध्ये ६७ वटा गोदाममा थन्किएको स्वास्थ्य सेवा विभाग अन्तर्गतको आपुर्ति व्यवस्था शाखा प्रमुख उपेन्द्र ढुङ्गानाले सीआईएनसंग बताउनुभयो ।

भेन्टिलेटर चलाउन क्रिटिकल केयर अर्थात जटिल हेरचाह सम्बन्धी विज्ञ स्वास्थ्यकर्मी आवश्यक पर्छ । स्वास्थ्य सेवा विभागका अनुसार भेन्टिलेटर चलाउन सक्ने विशेषज्ञको दरबन्दी सरकारी अस्पतालमा ८० मात्रै छ । त्यसमा पनि ५० पद रिक्त छन् ।

जनशक्ति उत्पादनको लागि काम भइरहेको स्वास्थ्य मन्त्रालयका सहायक प्रवक्ता समिरकुमार अधिकारीले बताउनुभयो र भेन्टिलेटर चलाउने जनशक्तिको अभाव भइरहको बेला कोरोनाको तेस्रो लहर जुनसुकै बेला पनि आउने विज्ञहरू बताउँछन्, जनशक्ति नभएकै बेला तेस्रो लहरले महामारीको रुप लियो भने भिन्टिलेटर गोदाममा थन्किने र नागरिकले अकालमा ज्यान गुमाउने अवस्था आउने भएकाले बेलैमा सचेत हुनुपर्दछ ।