काठमाण्डौं, ३१ बैशाख ।
सरकारले अक्सिजन आपूर्तिमा अस्पतालहरुमा लगाएको कोटा प्रणाली खारेज गरेको छ । अक्सिजनको व्यवस्थानको जिम्मेवारी स्वास्थ्य मन्त्रालयले पाएपछि आज एक विज्ञप्ती जारी गर्दै स्वास्थ्य मन्त्रालयले ,कोटा प्रणाली खारेज भएको जानकारी दिएका छ ।  
स्वास्थ्य मन्त्रालयले सबै अक्सिजन उत्पादक उद्योगहरुलाई सम्बोधन गर्दै अस्पतालहरुमा साविककै  नियमित ढुवानी प्रक्रियाबाट अक्सिजन उपलब्ध गराउन निर्देशन दिएको छ । हाललाई अर्को व्यवस्था नभएसम्म उद्योगबाट अस्पतालहरुमा साविककै नियमित ढुवानी प्रक्रियाबाट मेडिकल अक्सिजन उपलब्ध गराइदिनुहुन  तथा आकस्मिक व्यवस्थापनका लागि स्वास्थ्य तथा जनसंख्या मन्त्रायलको अक्सिजन वितरण व्यवस्थापन गर्ने उच्चस्तरीय टोलीहरुको निर्णय र निर्देशन अनुसार स्थानीय प्रशासनहरुसँग सहकार्य र सरोकारवाला अन्य निकायहरुको समन्वयमा गराईदिनुहुन अनुरोध छ, स्वास्थ्य मन्त्रालयले जारी गरेको विज्ञप्तीमा भनिएको छ । 
काठमाडौं उपत्यकाका अक्सिजन उद्योगहरुबाट अस्पतालमा अक्सिजन वितरण गर्दा सरकारले कोटा सिस्टममा वितरण गर्ने व्यवस्था गरेपछि सरकारी अस्पतालहरुमा समेत अक्सिजन अभावको अवस्था देखिएको थियो ।  
अक्सिजन अभाव हुँदा अस्पतालमा बिरामीको मृत्यु भइरहेको छ ।  सिसिएमसीको बैठकले निर्णय गरि लागु गरेको कोटा सिस्टमबाट झनै अक्सिजनको हाहाकार भएपछि सिसिएमसीले गर्दै आएको अक्सिजन वितरण प्रणालीलाई व्यवस्थित गर्ने जिम्मेवारी स्वास्थ्य तथा जनसंख्या मन्त्रालयले नै पाएको छ । सिसिएमसीले स्वास्थ्य मन्त्रालयलाई नै जिम्मेवारी दिएपछि अक्सिजन वितरण व्यवस्थापनका लागि स्वास्थ्य मन्त्रालयले उच्चस्तरीय टोली समेत गठन गरेको छ ।