आँबुखैरेनीको २ ठाउँबाट नगद करिब २ लाख सहित ७ जना जुवाडे पक्राउ

इच्छाकामना न्युज

१२, बैशाख २०७८

आँबुखैरेनीको २ ठाउँबाट नगद करिब २ लाख सहित ७ जना जुवाडे पक्राउ

आँबुखैरेनी, १२ बैशाख । तनहुँको आँबुखैरेनी गाउँपालिकाको २ स्थानबाट करिब २ लाख रुपैयाँ नगद सहित ७ जना जुवाडे पक्राउ परेका छन्। गाउँपालिकाको वडा नंं. १ आँधिमुल नजिकै र वडा नं. ३ स्थित आँबुखैरेनी बजार डाँडाटोलबाट अवैध रुपमा कौडा र जुवातास खेलिरहेको अवस्थामा जुवाडे पक्राउ परेका हुन्।

गाउँपालिकाको वडा नंं. १ आँधिमुल नजिकैबाट पक्राउ पर्नेहरुमा कदम गुरुङ, क्षेत्र बहादुर गुरुङ र विष्णुराज पन्त रहेका छन्। उनीहरुको साथबाट प्रहरीले १६ थान कौडाका साथै ७६ हजार ५ सय रुपैयाँ नगद बरामद गरेको छ।

यस्तै आँबुखैरेनी गाउँपालिका वडा नं. ३ स्थित आँबुखैरेनी बजार डाँडाटोलबाट जुवा तास खेलिरहेको अवस्थामा खेलाउने स्थानीय मन बहादुर श्रेष्ठ सहित खेलमा संलग्न हुने पुर्ण बहादुर संग्रौला, दिपक श्रेष्ठ, नरेन्द्र तामाङ, आकास तामाङ, बिरेन्द्र राउत बरही लगायतलाई पक्राउ गरेको प्रहरीले जानकारी दिएको छ। उनीहरुको साथबाट प्रहरीले १ लाख ११ हजार ३५ रुपैयाँ बरामद गरेको छ।

उनीहरु सबैलाई इलाका प्रहरी कार्यालय आँबुखैरेनीको प्रहरी टोलीले पक्राउ गरेको हो। पक्राउ परेकाहरुलाई जुवा तास मुद्दा शीर्षकमा मुद्दा दर्ता गरी जिल्ला प्रशासन कार्यालय तनहुँबाट म्याद थप गरी थप अनुसन्धानका लागि प्रहरी नियन्त्रणमा राखिएको जिल्ला प्रहरी कार्यालय तनहुँले जानकारी दिएको छ।

उल्लेखित समाचारमा पक्राउ परेको स्थान आँबुखैरेनी १ आँधिमुल र पक्राउ पर्नेहरुको स्थायी ठेगाना फरक पर्न गएकोले सच्याईएको जानकारी गराउदछौं। सं.