काठमाण्डौ, ६ फागुन । नेकपा एमालेको माधब नेपाल–झलनाथ खनाल पक्षले पार्टी अध्यक्ष तथा प्रधानमन्त्री केपी शर्मा ओली समक्ष पाँच बुँदे असहमति पत्र बुझाएको छ । असहमति पत्रमा ३८ जना सांसदले हस्ताक्षर गरेका छन् ।

पार्टी संसदीय दलको बैठक प्रधानमन्त्रीको सरकारी निवासमा आयोजना गर्न नहुने, पार्टीको बैठक नवौं महाधिवेशनले पारित गरेको विधान विपरीत आयोजना गर्न नहुने, विधान विपरीत नै संसदीय दलको बोर्ड गठन र संसदीय दलको बैठक राख्न नहुने लगायत बुँदाहरू असहमति पत्रमा समावेश गरिएको छ ।

पार्टी अध्यक्ष ओलीलाई असहमतिको पत्र बुझाउन सांसद जीवनराम श्रेष्ठ, सोमप्रसाद पाण्डे र यज्ञराज सुनुवार बालुवाटार पुगेका थिए । सांसद सुनुवारले सर्वोच्च अदालतले फागुन २३ गते फैसला मार्फत् नेकपा एमालेलाई पुनर्जीवन दिएकोले नवौं महाधिवेशनबाट निर्वाचित केन्द्रीय कमिटी बैठक बसाएर पार्टीको काम कारबाही अगाडि बढाउनुपर्ने बारेमा पनि कुरा भएको बताउनुभयो ।

तर आज बालुवाटारमा बसेको संसदीय दलको बैठकले  नेपाल–खनालपक्षको गुटगत भेलामा सहभागी भएका सांसदहरूलाई पार्टीको संसदीय बोर्ड मार्फत स्पष्टीकरण सोध्ने निर्णय गरेको छ । पार्टी अध्यक्ष केपी शर्मा ओली र महासचिव ईश्वर पोखरेलको निर्देशन, संसदीय दलको विधान र कानुन विपरीत गुटको भेलामा सहभागी भएका सबै सांसदहरूलाई स्पष्टीकरण सोध्ने आज बसेको दलको बैठकले निर्णय गरेको हो ।

यस्तै बैठकले एमालेको विधान, २०७२ संशोधनसहित पारित भएको छ । पार्टी संसदीय दलका प्रमुख सचेतक विशाल भट्टराई, शेरबहादुर तामाङ र डा. विमला राई पौडेल रहेको समितिले तयार गरेको विधान संशोधनको मस्यौदा आज बसेको संसदीय दलको बैठकले पारित गरेको हो ।

आजको बैठकमा पार्टी उपाध्यक्ष बामदेब गौतम भने सहभागि हुनुभएको छ ।  एमाले एकता अभियान सञ्चालन गरेका पार्टी उपाध्यक्ष गौतमले राजनीतिकसँगै पार्टी विधानबारे पनि मन्तव्य राख्नुभएको थियो ।