आँबुखैरेनी गाउँपालिकामा सञ्चालित सहकारीहरुको समन्वय समिति गठन

चैत २० गते राष्ट्रिय सहकारी दिवस मनाईने

इच्छाकामना न्युज

४, चैत्र २०७७

आँबुखैरेनी गाउँपालिकामा सञ्चालित सहकारीहरुको समन्वय समिति गठन

आँबुखैरेनी, ४ चैत । तनहुँको आँबुखैरेनी गाउँपालिकामा सञ्चालित विभिन्न सहकारी संस्थाहरुको प्रवद्र्धन गर्नका लागि गाउँपालिका स्तरीय सहकारी समन्वय प्रवद्र्धन समिति गठन गरिएको छ। मनकामना माई बहुउद्देश्यीय सहकारी संस्था लिमिटेडका अध्यक्ष भगवानदाश मल्ल संयोजक रहने गरि ९ सदस्यीय गाउँपालिका स्तरीय सहकारी समन्वय प्रवद्र्धन समिति गठन गरिएको हो ।

समितिको सह– संयोजकमा एकता बचत तथा ऋण सहकारी संस्थाका अध्यक्ष बाबुराम देवकोटा, सचिवमा आँबुखैरेनी बचत तथा ऋण सहकारी संस्थाका अध्यक्ष अनिल श्रेष्ठ, सदस्यहरुमा बरादी दुग्ध उत्पादक सहकारी संस्थाका अध्यक्ष छान प्रसाद अधिकारी, दिपज्योती बचत तथा ऋण सहकारी संस्थाका विरु गुरुङ, माई छिम्केश्वरी बचत तथा ऋण सहकारी संस्थाका अध्यक्ष रत्न कुमार श्रेष्ठ, अकला सहकारी संस्थाका अध्यक्ष मीना अधिकारी, मिलिजुली कृषि उत्पादक सहकारी संस्थाका अध्यक्ष इश्वरबाबु गौली र मित्रता बचत तथा ऋण सहकारी संस्थाका अध्यक्ष रामचन्द्र कंडेल रहेका छन् । यसैबिच समितिको शुक्रबार बसेको बैठकले २ वटा निर्णयहरु गरेको छ ।

जसमा आगामी चैत १२ गते बृहत बैठक सञ्चालन गर्ने र चैत २० गते परेको राष्ट्रिय सहकारी दिवस आँबुखैरेनीका सम्पूर्ण सहकारीहरु मिलि भव्य रुपमा मनाउने निर्णय गरिएको समितिका सचिव अनिल श्रेष्ठले जानकारी दिनुभयो ।