आँबुखैरेनी, ४ चैत । तनहुँको आँबुखैरेनी गाउँपालिकामा निर्माण हुने १५ बेडको आँबुखैरेनी अस्पतालको लागि जग्गा सिफारिस भएको छ । अस्पताल निर्माणका लागि वडा नं. १ स्थित सत्रसयमा रहेको वडा कार्यालय सँगैको करिब १४ रोपनी ऐलानी जग्गा सिफारिस भएको हो। सोहि स्थानमा हाल आधारभुत स्वास्थ्य केन्द्र समेत रहेको छ। 

फागुनमा सम्पन्न गाउँपालिकाको कार्यपालिका बैठकले निर्णय गरेरै सर्वसम्मत रुपमा आँबुखैरेनी अस्पताल निर्माणको लागि सत्रसयमा स्थान तय गरि सिफारिश गरिएको गाउँपालिकाका प्रमुख प्रशासकिय अधिकृत बिष्णुप्रसाद पोखरेलले जानकारी दिनुभयो । अधिकृत पोखरेलका अनुसार सिफारिस गरिएको स्थानलाई स्वीकृत भएर आएपछि अस्पताल निर्माणको काम थालिनेछ । 

यसैबिच आफ्नो वडामा अस्पताल निर्माण हुने भएपछि आँबुखैरेनी १ का स्थानीयहरुमा खुशी छाएको छ । आँबुखैरेनी अस्पताल आफ्नै ठाउँमा बन्ने भएपछि आफुलाई औधी खुशी लागेको वडा नं. १ का वडाध्यक्ष किसान थापाले बताउनुभयो । ‘यसले आँबुखैरेनी १ को पूर्वाधार विकासमा कोसेढुङ्गा सावित हुन सक्छ’ –उहाँले भन्नुभयो । पर्याप्त सार्वजनिक जग्गाका साथै मुख्य राजमार्गबाट नजिकै शान्त वातारण भएकोले अस्पताल निर्माणका लागि उपयुक्त स्थल भएकोले पनि आँबुखैरेनी अस्पताल निर्माणको लागि यो स्थान उत्तम भएको पनि वडाध्यक्ष थापाले बताउनुभयो । 

यहि २०७७ मंसिर १२ गतेको मन्त्रिपरिषद्को निर्णय बमोजिम अस्पताल नभएका २ सय ५९ वटा स्थानीय तहमा भुगोल र जनसंख्याको अवस्था हेरी ५ देखि १५ बेडको अस्पताल निर्माण गर्न सरकारले स्वास्थ्य तथा जनसंख्या मन्त्रालयलाई परिपत्र गरेको थियो । सोहि परिपत्र अनुसार मन्त्रालयले फागुन मसान्तसम्मको समयसीमा तोकी स्थानीय तहलाई अस्पताल निर्माणका लागि जग्गा व्यवस्थापन गरि पठाउन परिपत्र गरेको थियो ।