चितवन । हिजो १२ घण्टामा चितवनमा धेरै भारी वर्षा भएको छ । जल तथा मौसम विज्ञान विभागका अनुसार १२६ मिलीमिटर वर्षा मापन भएको हो । गोरखा र उदयपुरमा पनि धेरै पानी परेको थियो ।

विभागको मापन केन्द्रमा रेकर्ड भएको विवरणअनुसार गोरखामा ८१.२ मिलीमिटर वर्षा भएको छ भने उदयपुरमा ९० मिलीमिटर वर्षा भएको छ । १०० मिलीमिटरभन्दा माथि वर्षा भएमा त्यसलाई धेरै भारी वर्षा भएको भनेर परिभाषित गरिने विभागले जनाएको छ । यस्तै, लमजुङमा पनि ७६ मिलीमिटर वर्षा भएको छ ।

यस्तै अन्य केही जिल्लामा भारी वर्षा मापन भएको छ । जसअनुसार इलाममा ५०, झापामा ५४.४, सिन्धुपाल्चोकमा ४५.६, नुवाकोटमा ४३, मिलीमिटर वर्षा भएको छ । यी सबै मापन केन्द्रमा भारी वर्षा भएका हुन् ।

अन्य दुई दर्जन बढी मापन केन्द्रहरूमा २० मिलीमिटरभन्दा कम वर्षा भएका छन् । अहिले पनि इलाम, झापा, सिन्धुली, दोलखा, नुवाकोट, लमजुङलगायत जिल्लामा वर्षा भइरहेको छ । चितवनलगायत केही जिल्लामा भने रोकिएको छ ।

विभागको मौसम पूर्वानुमान महाशाखाका अनुसार हाल नेपालमा पश्चिमी न्यूनचापीय प्रणाली, उपल्लो वायुमण्डलमा रहेको उच्च चापीय प्रणाली र नेपालको पूर्वी भूभाग नजिटक तल्लो वायुमण्डलमा रहेको न्यून चापीय क्षेत्रको आंशिक प्रभाव रहेको छ ।

आज कोशी प्रदेशलगायत बाँकी पहाडी र हिमाली भूभागमा साधारणतया बादल लाग्ने तथा बाँकी भूभागमा आंशिक बादल लाग्नेछ । कोशी प्रदेशलगायत बागमती, गण्डकी र लुम्बिनी प्रदेशका पहाडी र हिमाली भागका थोरै स्थान, कर्णाली र सुदूरपश्चिम प्रदेशका पहाडी र हिमाली भूभाग तथा मधेस, बागमती र गण्डकी प्रदेशको तराई भूभागका एकदुई स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ ।