भरतपुर । प्रतिनिधिसभाको निर्वाचनले छपक्कै छोप्न थालेको छ । दलका उमेदवार र तिनका समर्थकले प्रचारप्रसारलाई थप तीव्र बनाउन थालेका छन् । केही महिनाअघिमात्रै उदाएको श्रम संस्कृति पार्टी र तिनका उमेदवारहरुले पनि चुनावी प्रचारप्रसारलाई व्यापक बनाउँदै लगेका छन् । देशकै चर्चामा रहेको चितवन–२ बाट उमेदवारी दिएका मिलन थापामगरले कार्यकर्ता भेटघाटसँगै मतदातासमक्ष आफ्ना चुनावी प्रतिबद्धता पेस गर्दै हिँडेका छन् ।

नेपाल मगर संघको माध्यमबाट सामाजिक काममा लामो अनुभव बटुलेका मिलनले आफूलाई हर्कपथको माध्यमबाट राजनीतिक यात्रामा अघि बढाउने प्रयास गरेका छन् । धरानका तत्कालीन मेयर हर्कराज साम्पाङ राई नेतृत्वको पार्टीले यही निर्वाचनबाट चितवनमा पनि बलियो उपस्थिति जनाउने प्रयास गरिरहेको छ । तसर्थ, मिलन थापामगरले चुनाव जित्ने अठोट लिएर मैदानमा होमिएका छन् ।

‘संसदीय निर्वाचनको अभ्यासमा पहिलोपटक सहभागी भएको छु । तर, चितवनमा पुराना दलहरुबाट आजित भएका मतदाता हाम्रो उपस्थितिले खुसी हुनुहुन्छ’, उनी भन्छन्, ‘पार्टी स्थापना भएकै वर्षदेखि हामी जनमानसमा प्रवेश गर्न सफल भएका छौँ । पुराना माथिको भरोसा टुटिसकेको हुँदा नयाँ दल मतदाताको रोजाइमा पर्ने देखिन्छ ।’

उनले श्रमको सम्मान र जनश्रम, भ्रष्टाचारविरूद्ध कठोर अडान, जनतासँग प्रत्यक्ष संवाद, दलभन्दामाथि जनहित, आत्मनिर्भरता, परिणाममुखी शासनप्रणाली, श्रम र संस्कृतिलाई विकासको आधार बनाउने योजना अघि सार्दै आएका छन् ।

प्रत्येक स्थानीय तहमा श्रम बैंक स्थापना गर्दै युवालाई देशभित्रै रोक्नका लागि आवश्यक सीप तथा श्रममा आधारित उद्योग स्थापना गर्ने लक्ष्य राखेका छन् । श्रमिकको न्यूनतम ज्याला, सामाजिक सुरक्षा र सम्मान सुनिश्चितता र अनिवार्य श्रम र श्रमदानलाई पनि चुनावका लागि मुख्य मुद्दा बनाएको छ ।

कृषि क्षेत्रका लागि खेतदेखि बजारसम्म सहजीकरण गरिदिने, किसानलाई उत्पादनको आधारमा उचित मूल्य दिलाउने, सहकारीमार्फत आधुनिक कृषि प्रविधिको विकास र प्रयोग गर्ने तथा मल, बीउ र सिंचाइमा राज्यले प्रत्यक्ष जिम्मेवारी लिनेजस्ता विषयलाई पनि हर्कपथले छोएको छ ।

शिक्षालाई रोजगारीसँग जोड्नुका साथै प्राविधिक तथा व्यावसायिक शिक्षा विस्तारमा पनि जोड दिएको छ । श्रमिकमैत्री स्वास्थ्य बिमा कार्यक्रम लागू गरी नागरिकस्तरमा स्वास्थ्यसेवाको पहुँच पु¥याउने लक्ष्य पनि पार्टीले अघि सारेको छ ।

‘उल्लेखित बुँदाहरुलाई बोलेर होइन, कार्यान्वयन गरेर देखाउने प्रतिनिधिको रुपमा आफूलाई स्थापित गराउन चाहन्छु’, चितवन क्षेत्र नं २ का उमेदवार मगर भन्छन्, ‘म जनताबाट टाढा होइन, सधैँ साथमै रहन्छु ।’ आफूले गरेका गतिविधि र निर्णय जनताका लागि सदैव खुला रहनेसमेत उनले प्रतिबद्धता जनाएका छन् ।

तीनवटा निर्वाचन क्षेत्र भएको चितवनमा क्षेत्र नं २ बढी चर्चामा छ । किनकि राष्ट्रिय स्वतन्त्र पार्टी (रास्वपा)का सभापति रवि लामिछाने तेस्रोपटक यही क्षेत्रबाट चुनाव लड्दैछन् ।

लामिछानेबाहेक नेपाली कांग्रेसबाट अधिकारकर्मी मीनाकुमारी खरेल, नेकपा एमालेबाट अस्मिन घिमिरे र नेपाल कम्युनिस्ट पार्टी (नेकपा) बाट प्रताप गुरूङ पहिलोपटक चुनावी मैदानमा छन् ।