रामबाबु सुवेदी

भरतपुर । आगामी प्रतिनिधिसभाको निर्वाचनका लागि नेकपा (एमाले) चितवनले तीन वटा क्षेत्रबाट २७ जनाको नाम सिफारिस गरेको छ । चितवन क्षेत्र नं १ बाट ६ जना, चितवन क्षेत्र नं २ बाट १५ जना र चितवन क्षेत्र नं ३ बाट ६ जना गरी २७ जनाको नाम सिफारिस भएको हो ।

क्षेत्रीय कमिटीले सिफारिस गरेको २७ जनाको नाममाथि जिल्ला कमिटीको आज बुधबार बस्ने जिल्ला कमिटीको बैठकमा छलफल हुनेछ । सम्भवतः बुधबार फाइनल गरिएको नामलाई केन्द्रमा पठाइने एमाले चितवनले जनाएको छ ।

क्षेत्र नम्बर ३ चितवनले छ जनाको नाम सिफारिस गरेको छ । क्षेत्रीय कमिटीका संयोजक सुदीप रेग्मीका अनुसार भरतपुर–६, चोकबजारमा बसेको बैठकले पार्टी नेताहरुको आकाङ्क्षाका आधारमा नाम सङ्कलन गरेर जिल्ला कमिटीमा सिफारिस गरिएको हो । क्षेत्र नं ३ मा उमेदवार बन्नका लागि राष्ट्रिय सभा राष्ट्रिय सरोकार समितिकी निवर्तमान सभापति दिलकुमारी रावल पार्वती, एमाले भरतपुर महानगर कमिटी अध्यक्ष शंकर थपलिया, क्षेत्रीय संयोजक सुदीप रेग्मी, विजय विक, डोलनाथ अधिकारी र दिव्य शर्माको नाम सिफारिस गरेको हो । जिल्ला कमिटीले क्षेत्रीय कमिटीबाट आएको नाम छनोट गरेर बुधबार प्रदेश कमिटी हुँदै केन्द्रीय कमिटीमा पठाउनेछ ।

यस्तै, क्षेत्र नं २ का सचिव प्रकाश आचार्यका अनुसार क्षेत्र नं २ बाट आगामी निर्वाचनमा प्रत्यक्षतर्फ उमेदवार बन्नको लागि १५ जनाको नाम जिल्ला कमिटीमा सिफारिस भएको छ । देवी ज्ञवाली, कृष्णभक्त पोखरेल, विजय सुवेदी, रमाकान्त सापकोटा, कृष्णप्रसाद सिलवाल, राजकुमार श्रेष्ठ, डा तिलचन्द्र भट्टराई, सुनिता अधिकारी, अश्विन घिमिरे, रामचन्द्र कँडेल, धिरनबाबु घिमिरे, अविरल पोखरेल, शारदा कुमाल, शम्भु सुवेदी, शंकर अधिकारीको नाम सिफारिस भएको छ ।

यस्तै, चितवन क्षेत्र नं १ मा ६ जनाको नाम जिल्ला कमिटीमा सिफारिस भएको छ । एमाले प्रदेश कमिटी उपाध्यक्ष दावादोर्जे लामा, चितवन जिल्ला अध्यक्ष कमलराज पाठक, एमाले प्रदेश कमिटी सदस्य रत्ननगर ५ निवासी लक्ष्मी कोइराला पोख्रेल, एमाले केन्द्रीय विभागका पूर्वसदस्य रत्ननगर १३ का डा. किशोरचन्द्र खनाल, चितवन क्षेत्र नम्बर १ (क) संयोजक खैरहनी कुमरोजका कृष्णलाल चौधरी र क्षेत्र नं १ का सचिव खैरहनी ८ का भरत भण्डारीको नाम सिफारिस गरिएको छ ।