जमुनाह (बाँके)। बाँकेमा पुसको सुरुवातसँगै बढेको अत्यधिक चिसो र निरन्तरको शीतलहरका कारण सर्वसाधारणको दैनिकी अत्यन्तै कष्टकर बनेको छ । पुस लागेयता घाम नलागेका कारण बढेको चिसोले विपन्न तथा मजदुरलाई बढी प्रभाव पारेको छ । यसै परिस्थितिलाई ध्यानमा राख्दै स्थानीय तह र सुरक्षा निकायले प्रभावित क्षेत्रमा राहत सुरु गरेका छन् । 

बढ्दो चिसोबाट सर्वसाधारणलाई जोगाउन नेपाली सेनाको बज्रदल गण राँझाले सक्रियता देखाएको छ । गणले जिल्लाका खजुरा, पुरैना, फूलटेक्रा र आलानगरलगायतका विभिन्न सार्वजनिक स्थानमा आगो ताप्नका लागि दाउरा उपलब्ध गराएको छ । बज्रदल गणका गणपति प्रमुख सेनानी रामचन्द्र श्रेष्ठले मानवीय सेवाको उद्देश्यले प्रभावितका लागि दाउरा सहयोग गरिएको बताउनुभयो । 

सेनासँगै स्थानीय तहले पनि दाउरा वितरणलाई तीव्रता दिएका छन् । सार्वजनिक स्थानमा आगो बाल्नका लागि ६४ चट्टा दाउरा मौज्दात रहेकोमा नरैनापुरले १० चट्टा तथा बैजनाथ र राप्तीसोनारीले दुई/दुई चट्टा दाउरा वितरण गरिसकेका छन् भने नेपालगन्ज उपमहानगरपालिकाले पनि दाउरा 

वितरण सुरु गरेको छ । दाउरासँगै विभिन्न पालिकाले गरिब तथा विपन्न परिवारलक्षित कम्बल वितरण कार्यलाई पनि अगाडि बढाएका छन् । हालसम्म जिल्लाका विभिन्न पालिकामा एक हजार ८० थान कम्बल वितरण भइसकेको छ । जस अन्तर्गत जानकी गाउँपालिकामा सबैभन्दा धेरै आठ सय थान, राप्तीसोनारीमा १८० थान तथा कोहलपुर र खजुरामा ५०/५० थान कम्बल वितरण गरिएको छ । 

बैजनाथ गाउँपालिकाले पनि कम्बल वितरण प्रक्रिया सुरु गरिसकेको छ भने जिल्लाभर अझै एक हजार ७८० थान कम्बल मौज्दात अवस्थामा राखेको छ । जिल्ला विपत् व्यवस्थापन समिति बाँकेले चिसो तथा शीतलहर पूर्वतयारी तथा प्रतिकार्य योजनालाई अद्यावधिक गर्दै सोही अनुसार काम गरिरहेको जनाएको छ । समितिको प्रक्षेपण अनुसार यस वर्ष बाँकेमा ३६ हजार घरपरिवारका करिब एक लाख ७६ हजार मानिस चिसो र शीतलहरबाट प्रभावित हुन सक्ने देखिएको छ । 

चिसोको जोखिम बढ्दै गएपछि स्थानीय प्रशासनले सर्वसाधारणका लागि सावधानीका सन्देशसमेत प्रवाह गरिरहेको छ । जसमा घरबाहिर काम परेपछि मात्र निस्कन, न्यानो लुगा लगाउन र तातो झोलिलो खानेकुराको अत्यधिक सेवन गर्न आग्रह गरिएको छ ।