कुलप्रसाद काफ्ले
भरतपुर । फेसबुकमार्फत प्रेम सम्बन्ध कायम गरेर बालिकालाई बलात्कार गर्ने एक युवक जेल पुगेका छन् । १३ वर्षीया बालिकालाई जबरजस्ती करणी (बलात्कार) गरेको अभियोगमा चितवन जिल्ला अदालतले २२ वर्षीय पुरुषलाई पुर्पक्षका लागि थुनामा पठाएको छ । जिल्ला न्यायाधीशस यदुराज शर्माको इजलासले प्रतिवादी विराज गुरुङलाई बुधबार पुर्पक्षका लागि थुनामा पठाउन आदेश दिएको हो ।

चितवनको खैरहनी नगरपालिका घर भई कालिका नगरपालिकास्थित मामाघरमा बस्दै आएका गुरुङले १२ वर्ष १० महिना १३ दिनकी बालिकालाई ललाईफकाई गरी प्रेमजालमा पारेर बलात्कार गरेको आरोप छ । मामाघरमा बसेर ट्याक्टर चलाउने काम गर्दै आएका गुरुङ र पीडित बालिका करिब छ महिना अगाडि फेसकुमा साथी बनेका थिए । फेसबुकमा साथी बनेर म्यासेन्जरमार्फत कुराकानी गर्न थालेका उनीहरुबीच माया बसेको थियो ।

बालिकाकी आमाले पटकपटक फोन गरेपछि उनीहरु सोही दिन फर्किएका थिए । रामपुरबाट फर्किएकी बालिकाले आफूलाई युवकले बलात्कार गरेको बताएपछि बालिकाकी आमाले गुरुङविरुद्ध प्रहरीमा जाहेरी दिएकी थिइन् । प्रहरीले प्रतिवादी गुरुङलाई काात्तिक २९ गते जुटपानीबाट पक्राउ गरेको थियो ।

पछिल्लो समय सामाजिक सञ्जालको दुरुपयोगबाट बालबालिकाहरुमाथि अपराध हुने क्रम बढ्दो छ । धेरैजसो बालबालिकाहरु सामाजिक सञ्जालमार्फत विभिन्न अपराधको सिकार भएका छन् । लैङ्गिक हिंसा विरुद्धको १६ दिने अभियान सञ्चालन भएको अवधिमा सरकारी वकिलको कार्यालयले जबरजस्ती करणीका दुई वटा मुद्दा अदालतमा दर्ता गरेको छ । यसअघि मङ्सिर १६ गते बालकले बालिकालाई जबरजस्ती करणी गरेको मुद्दा अदातलमा दर्ता भएको थियो ।
चितवनमा एकै महिनामा तीनदेखि चार वटासम्म बलात्कारका मुद्दा अदालतमा पुग्ने गर्छन् । यसपालिको लैङ्गिक हिंसाविरुद्धको १६ दिने अभियानको राष्ट्रिय नारा नै ‘प्रविधिको सही प्रयोग गरौँ ः लैङ्गिक हिंसा अन्त्य गरौँ’ भन्ने रहेको छ । यो अभियान बुधबारदेखि सकिएको छ ।