२ वर्ष देखि अवरुद्ध जामाखोला लघु जलविद्युत आयोजना सुरु

इच्छाकामना न्युज

१७, फाल्गुण २०७७

२ वर्ष देखि अवरुद्ध जामाखोला लघु जलविद्युत आयोजना सुरु

रुकुम पश्चिम, १७ फागुन । रुकुम पूर्वको सिस्ने गाउँपालिका वडा नम्बर ८ को धपेमा रहेको जामाखोला लघु जलविद्युत आयोजना लामो समय पछि पुनः संचालनमा आएको छ । साढे २ वर्ष अघि देखी बन्द अवस्थामा रहेको आयोजना आजबाट पुनः सञ्चालनमा आएको हो ।
२०७२ माघ २६ गते निर्माण भएको यो आयोजना त्यसको ४ वर्ष पछि ७५ असोज ३० गते आएको पहिरोले क्षेति गरेपछि बन्द भएको थियो । ९० किलोवाट क्षमताको यो आयोजनाबाट सिस्ने गाउँपालिका वडा नम्बर ७ र ८ तथा रुकुम पश्चिमको मुसीकोट नगरपालिका १ छिङका गरी ९ सय २६ घरमा विद्युत पुगेको थियो । वैकल्पिक ऊर्जा प्रवद्र्धन केन्द्रको २ करोड १३ लाख र स्थानीयको श्रमदान गरी झन्डै ४ करोड रुपैयाँको लगानीमा सुरुमा आयोजना निर्माण भयको थियो । हाल भने विग्रिएको आयोजना करिब आधा करोडको लागतमा पुनर्निर्माण गरिएको हो ।
प्रतिनिधिसभा सदस्य कमला रोकाको पूर्वाधार क्षेत्र विकास कार्यक्रमबाट आएको ४९ लाख ९७ हजार १ सय ७२ रुपैयामा क्षतिग्रस्त विद्युत आयोजनाको पुर्ननिर्माण भएपछि पुनः घर घरमा बत्ति बलेको विद्युत उपभोक्ता समितिका अध्यक्ष बिर्खबहादुर बुढाले जानकारी दिनुभयो ।लामो समय पछि बत्ति बाल्न पाएपछि उपभोक्ताहरु हर्षित भएका छन् । आईतबार विद्युत गृहमा बत्ति बालिएकामा आज उपभोक्ताहरुको घर घरमा विद्युत वितरण गरिएको उपभोक्ता समितिले जनाएको छ ।