सप्तरी । सप्तरीको सुरुङ्गा नगरपालिकामा शनिबार मध्यरातमा भएको एक भयावह डकैती घटनामा एक जनाको ज्यान गएको छ भने अर्का एक व्यक्ति गम्भीर घाइते भएका छन्। डाँका समूहले लुटपाटको क्रममा प्रतिकार गर्दा घरधनीमाथि गोली र धारिलो हतियार दुवै प्रहार गरेको प्रहरीले प्रारम्भिक जानकारी दिएको छ।
घटना सुरुङ्गा नगरपालिका वडा नम्बर ८ निवासी कान्तलाल चौधरीको घरमा राति करिब १ बजेतिर घटेको हो। सप्तरी प्रहरीका अनुसार, अपरिचित हतियारधारी समूह लुटपाटकै उद्देश्यले घरभित्र प्रवेश गरेको थियो। धनमाल जोगाउन चौधरीले प्रतिकार गर्न खोज्दा डाँकाहरूले उनीमाथि निर्ममतापूर्वक आक्रमण गरेका थिए। आक्रमणमा परी घरधनी कान्तलाल चौधरीको घटनास्थलमै मृत्यु भएको सप्तरी प्रहरीले पुष्टि गरेको छ।
चौधरीलाई बचाउन दौडिएका छिमेकी रामाकान्त चौधरी पनि डाँकाहरूको निशानामा परे। डाँका समूहको आक्रमणबाट उनी गम्भीर घाइते भएका छन् र उनको लहानस्थित प्रादेशिक अस्पतालमा उपचार भइरहेको प्रहरीले जनाएको छ।
सप्तरी प्रहरी प्रमुख ढकेन्द्र खतिवडाका अनुसार, डाँका समूहले घरबाट अन्दाजी ५ तोला सुन, २ किलो चाँदी र केही नगद समेत लुटेर लगेको प्रारम्भिक अनुसन्धानबाट खुलेको छ।
मृतक चौधरीको मृत्यु गोली लागेर भएको हो वा धारिलो हतियारको चोटका कारण, सो विषयमा प्रहरीले सूक्ष्म अनुसन्धान गरिरहेको छ। “गोली प्रहार भएको र धारिलो हतियार पनि प्रयोग भएको देखिन्छ, तर मृत्युको यकिन कारण पोष्टमार्टम रिपोर्ट र विस्तृत अनुसन्धानपछि मात्र भन्न सकिनेछ,” एक अनुसन्धान अधिकृतले बताए।
मध्यरातमा भएको यो आतंकपूर्ण घटनाले सुरुङ्गा नगरपालिका क्षेत्रमा त्रास फैलिएको छ। प्रहरीले घटनास्थललाई नियन्त्रणमा लिई थप अनुसन्धान तीव्र पारेको र फरार डाँकाहरूको खोजी कार्य जारी राखेको जनाएको छ।