काभ्रेपलाञ्चोक । गुरुङ समुदायको बसोबास भएको गाउँ मन्डन देउपुर नगरपालिका–३ काभ्रेमा सामुदायिक होमस्टे सुरु भएको छ । पर्यटकीय क्षेत्र नगरकोटको काखैमा रहेको खस्रे गुरुङ गाउँमा पर्यटनलाई थप विकास गर्न र स्थानीय सँस्कार, सँस्कृतिलाई जर्गेना गरी राष्ट्रिय तथा अन्र्तराष्ट्रिय रुपमा परिचित गराउन सामुदायिक होमस्टे सुरु गरेको हो ।

काभ्रेको पर्यटकीय क्षेत्र नगरकोट नजिकै खस्रे गुरुङ गाउँमा नगरपालिका र संयुक्त राष्ट्र संघको खाद्य तथा कृषि संगठन “FAO” को आर्थिक सहयोगमा फोर बेटर्स नमुना गाउँ (Four Betters Model Village)को मोडलमा सञ्चालित सामुदायिक होमस्टे पहिलो हो । स्थानीय गुरुङ समुदायको सक्रियतामा सञ्चालित सामुदायिक होमस्टेले स्थानीय रैथाने बालीको विकास हुने र गाउँमा उत्पादित अर्गानिक बस्तुले समेत बजार पाउने स्थानीयले अपेक्षा गरेको छ ।

सञ्चालक समितिले सोमबार कार्यक्रम आयोजना गरी होमस्टे औपचारिक रुपमा सञ्चालन गरेको हो । होमस्टे सञ्चालक समितिले आयोजना गरेको कार्यक्रममा नगरप्रमुख टोक बहादुर तामाङ, स्थानीय जनप्रतिनिधीहरु लगायत सहयोगी दातृनिकायका प्रतिनीधिहरुको उपस्थिति रहेको थियो ।

सो कार्यक्रममा गुरुङ सँस्कार र साँस्कृतिमा आधारित नृत्य प्रस्तुत गरेको थियो । कार्यक्रममा सहभागी भएका विदेशी तथा स्वदेशी पाहुनालाई रैथाने बालीबाट बनेको खानेकुरा, सिस्नोको सुप, कोदोको लोकल रक्सीले स्वागत गरेको थियो ।

खस्रे गुुरुङ सामुदायिक होमस्टेमा आउने पाहुनाहरुले दुई तरिकाबाट बस्न सकिने स्थानीय समाजसेवि एवं होम स्टे सञ्चालक समितका सदस्य रमेश गुरुङले बताए । उनका अनुसार स्थानीय उत्पादित रैथाने कषिको परिकार अर्डर गरी वा आफैले ल्याएको खानेकुरा पकाएर खाई होमस्टेमा बस्न सकिने बताए ।

होमस्टेका सञ्चालक समितिकी सदस्य विना गुरुङले राजधानी काठमाडौबाट नजिकै भएको हुदाँ सफा, स्वच्छ र रमणीय वातावरणमा घुम्नको लागि खस्रे गुरुङ गाउँमा एक चोटी भ्रमणमा आउन सबैलाई निम्तो गरेकी छन् । उनले खस्रे गुरुङ गाउँमा आएपछि स्थानीय उत्पादन र विषादीरहित, अर्गानिक परिकारहरुको स्वाद लिन सकिने बताईन् ।

यस गाउँको होमस्टेमा एकै पटक नब्बेदेखि एक सय जना पाहुना बस्न सकिने क्षमता रहेको छ । होमस्टे सञ्चालन प्रावधान ऐन अनुसार एक घरमा दुइवटा मात्र बेडको व्यवस्था हुने रहेकोले सिंगो गाउँभरिकै स्थानीयले पाँहुनालाई राख्न सकिनेछ । गाउँमा आउने पर्यटकहरुले चुलोमा पकाएको अर्गानिक खानाको स्वाद लिन सकिनेछ ।

खस्रे गुुरुङ सामुदायिक होमस्टेमै किन जाने त ?
पर्यटकीय क्षेत्र नगरकोटको काखैमा रहेको खस्रेमा चिटिक्क परेका आधुनिक जस्तामा सज्जिएको करिब ५० घरधुरि रहेको गुरूङ बस्ती आफैंमा प्राकृतिक रूपमा सुन्दर छ । राजधानी काठमाडौंबाट करिब ३४ किलोमिटरको दुरी यात्रा तय गरिसकेपछि खस्रे गुरुङ गाँउ पुग्न सकिन्छ ।

गुरूङ जातिको बाहुल्य रहेको यो गाउँबाट गौरीशंकर, जुगल लगायत अन्य हिमालहरु र चारैतिर हरियाली रमणीय प्राकृतिक सौन्र्दयको दृश्य अवलोकन गर्न पाइन्छ । सफा अनि सुन्दर खस्रे गुरुङ गाउँमा खानेपानी, विद्युत, स्वास्थ्य, शिक्षा, सडक बाटो सबैको सुविधा रहेको छ ।

स्थानीय गुरुङ सँस्कार र सँस्कृतिमा आधारित भेषभुषा, रहनसहनसँगै लोकल र विषादीरहित कोदो, गँहु, फापर, मकै, उँवा, भटमास, केराउ लगायतबाट बनेको अर्गानीक खानेकुरा यहाँको मुख्य आर्कषण हो । यहाँ गुन्द्रुकको अचार, साँधेको भटमास, लोकल कोदोको रक्सी, सिस्नोको सुप, रायोको साग, लोकल कुखुरा, कालिज, गाईभैसीको लोकल र ताजा दुधदही, घ्यू, मह, आलुको परिकार लगायत अर्गानिक खानाहरु पाइन्छ ।

त्यसैगरी, होमस्टेमा आउने पर्यटक तथा पाहुनाहरुलाई गुरुङ जातिको मौलिक र साँस्कृतिहरु घाँटु, सोरठी, झ्याउरे, सालैजो, झोर्रा लगायत नृत्य तथा गीतसंगित पनि मनोरञ्जनका लागि देखाइने गरिन्छ ।

फोटोफिचर