उपत्यकाका अस्पतालमा काम गर्ने ४५ प्रतिशत स्वास्थ्यकर्मीमा कोरोनाको एन्टीबडी देखियो

इच्छाकामना न्युज

११, फाल्गुण २०७७

उपत्यकाका अस्पतालमा काम गर्ने ४५ प्रतिशत स्वास्थ्यकर्मीमा कोरोनाको एन्टीबडी देखियो

काठमाण्डौ, ११ फागुन । नेपाल स्वास्थ्य अनुसन्धान परिषद्को अध्ययनले काठमाडौं उपत्यकाका अस्पतालमा कामगर्ने ४५ प्रतिशत स्वास्थ्यकर्मीमा कोरोनाको एन्टीबडी देखिएको देखाएको छ । उपत्यकाका २० वटा अस्पतालका स्वास्थ्यकर्मी तथा कर्मचारीहरुमा गरिएको सेरोइपिडिमियोलोजी अध्ययनले अस्पतालमा काम गर्ने कर्मचारी मध्ये सबैभन्दा बढी ३६ प्रतिशत नर्सहरु कोरोना सङ्क्रमित भएको जनाएको छ ।
अध्ययनका अनुसार नर्सपछि प्रशासन तर्फका २२ प्रतिशत कर्मचारी सङ्क्रमित पाइएको थियो । त्यसैगरी १८ प्रतिशत चिकित्सक, ७ प्रतिशत प्रयोगशाला र औषधि पसलमा काम गर्ने फर्मासिस्टलाई सङ्क्रमण देखिएको थियो । त्यसैगरी १७ प्रतिशत अन्य कर्मचारीमा कोभिड–१९ पुष्टि भएको थियो । काठमाडौं उपत्यकामा कोभिड–१९ को सेरोइपिडिमियोलोजी अध्ययनका अनुसार उपत्यकाका अस्पतालहरुमा कामगर्ने स्वास्थ्यकर्मीहरुमा कोभिड–१९ को सङ्क्रमणको अवस्था अध्ययनको लागि गरिएको सर्वेक्षणमा त्यस्तो नतिजा देखिएको हो ।
अध्ययन अनुसार २० वटा अस्पतालमा ३२ प्रतिशत देखि ५६ प्रतिशतसम्ममा एन्टीबडीको संयोजित व्यापकता रहेको देखिएको छ । अनुसन्धानमा बीर अस्पताल, नेपाल आँखा अस्पताल, प्रसुति गृह, ह्याम्स अस्पताल, निजामती कर्मचारी अस्पताल, भेनस अस्पताल, मेडिसिटी अस्पताल, अल्का अस्पताल, त्रिवि शिक्षण अस्पताल, ग्राण्डी अस्पताल, कान्तिवाल अस्पताल लगायतका कर्मचारी सहभागी थिए । उनीहरुमा कोभिड–१९ भएन भएको हेर्न एन्टीबडी व्यापकता जाँच गरिएको थियो ।