काठमाडौं, १० फागुन । सरकारका प्रवक्ता एवम् सञ्चार तथा सूचना प्रविधिमन्त्री पार्वत गुरुङसँग नेपालका लागि इजरायली राजदुत हानान गोडरले शिष्टाचार भेटवार्ता गरेका छन् ।

सोमबार सिंहदरवारस्थित मन्त्रालयमा मन्त्री गुरुङ र राजदूत गोडरबीच दुई देशबीचको आपसी हितका विविध विषयमा केन्द्रित रहेर भेटवार्ता भएको हो ।

भेटमा मन्त्री गुरुङले इजरायलले सेटलाईट प्रविधिको क्षेत्रमा गरेको प्रगतिबारे जानकारी लिएका थिए । उनले नेपालले सूचना प्रविधिको क्षेत्रको विकासलाई पहिलो प्राथमिकतामा राखेको उल्लेख गर्दै त्यसमा मित्र राष्ट्रहरुले आर्जन गरेको ज्ञान, सीप, अनुुभव उपयोगी हुने विश्वास व्यक्त गरेका थिए भने राजदूत गोडरले नेपालको सूचना प्रविधि क्षेत्रको विकासका लागि इजरायलको सेटलाईट प्रविधि सहज हुने उल्लेख गर्दै त्यसका लागि नेपाल सरकारलाई सहयोग गर्न तत्पर रहेको बताए ।

“सूचना प्रविधिको क्षेत्रको विकासका लागि नेपाल सरकारले डिजिटल नेपाल फ्रेमवर्कको कामलाई प्राथमिकताका साथ अघि बढाएको छ” राजदूत गोडरीसँगको भेटमा मन्त्री गुरुङले भने, “त्यसका लागि अन्य देशहरुले सूचना र प्रविधिको क्षेत्रमा गरेको विकास नेपालको लागि अति उपयोगी हुनेछ ।”

उनले नेपालले ‘समृद्ध नेपालः सुुःखी नेपाली’को राष्ट्रिय संकल्प पूरा हुने गरी सूचनाप्रविधि क्षेत्रको विकासका लागि पूूर्वाधार निर्माणमा जोड दिएको पनि बताए ।

त्यस अवसरमा मन्त्री गुरुङले नेपालीहरुलाई रोजगारीको अवसर दिएको तथा नेपालको कृषि क्षेत्रको विकासका लागि इजरायलले गरेको सहयोगप्रति आभार व्यक्त गरे भने राजदूूत गोडरले नेपालको कृषि, पर्यटन तथा सेटलाईट प्रविधिको क्षेत्रमा सहयोग गर्न तत्पर रहेको बताएका थिए ।