गोरखा । गोरखाको बारपाक सुलिकोट गाउँपालिकामा व्यवसायिक ओखर खेती सुरु गरिएको छ । पालिकाको वडा नं ३ र ४ अन्तरगत वर्षाँैदेखि बाँझो बसेको करिब पाँचसय रोपनी जमिनमा व्यवसायिक ओखरखेती सुरु गरिएको पालिका अध्यक्ष विष्णुप्रसाद भट्टले बताए ।

‘कागतेखर्क क्षेत्रमा पहिला गोठ राख्ने चलन थियो, बिस्तारै त्यो चलन हराएपछि त्यस क्षेत्र बर्षौंदेखि बाँझो छ’, उनले भने । बाँझो जमिनको सदुपयोगसँगै कृषकहरुको आयआर्जन बृद्धि गर्ने उदेश्य सहित सो स्थानमा ओखर खेती सुरु गरिएको उनले बताए ।
प्रदेशको मुख्यमन्त्री नवप्रर्वद्धन कार्यक्रम र गाउँपालिकाको संयुक्त साझेदारीमा ओखरखेती कार्यक्रम सुरु गरिएको उनले जानकारी दिए ।

‘प्रदेशको ६० लाख र गाउँपालिकाको २० लाख गरी जम्मा ८० लाख बजेटमा कार्यक्रम सुरु गरिएको हो’, उनले भने, ‘कार्यक्रम अन्तरगत पालिकाको वडा नं ३ र ४ मा पर्ने कागतेखर्कमा धमाधम ओखरको बिरुवा सार्ने काम भईरहेको छ ।’ कागतेखर्कको झन्डै ३५ घरधुरीको संलग्नतामा २१ सय बोट ओखर रोप्ने काम भईरहेको उनले बताएका छन् । पालिकाले जुम्लाबाट ओखरको बिरुवा खरिद गरेर ल्याएको उनको भनाइ छ ।

व्यवसायिक ओखरखेती अन्तरगत ओखरको बिरुवा वितरण गर्नुका साथै मोल र सिँचाईको कार्यक्रम समेत रहेको पालिका अध्यक्ष भट्टले बताए । ‘एउटै बिरुवालाई झन्डै ८ सय रुपैँया पर्न जाने रहेछ, बिरुवा सार्न एक घनमिटर खाडल खन्नुपर्ने हुन्छ । त्यो पनि कार्यक्रम अन्तरगत नै भइरहेको छ’, उनले भने । हाल लगाइएको बिरुवाले चारदेखि पाँचवर्ष भित्रमा उत्पादन दिन सुरु गर्ने उनले जनाएका छन् ।

पालिकाले कृषि ज्ञान केन्द्रको सल्लाह अनुसार कागतेखर्क क्षेत्रमा व्यवसायिक ओखर खेतीको थालनी गरेको हो । जिल्लामा नै पहिलो पटक बारपाक सुलिकोट गाउँपालिकाले व्यवसायिक ओखर खेती सुरु गरेको पालिका अध्यक्ष विष्णु प्रसाद भट्टले दाबी गरेका छन् । पालिकाले कृषिबाट प्राविधिकको टोली बोलाएर माटो परिक्षण गरी विधिवत रुपमा ओखर खेती सुरु गरेको उनले बताएका छन् ।