चितवन,माघ २८ । चितवन राष्ट्रिय निकुञ्ज सुरक्षार्थ बसेको नेपाली सेनाले गोली हानेर जंगली हात्ती मकुना मारेको घटनाका बारेमा छानविन गर्न गठन समिति चितवन आएको छ । घटनाको छानबिन गर्न वन मन्त्रालयका सहसचिव बुद्धिसागर पौडेलको संयोजकत्वको टोली चितवन आएर सरोकारवाला पक्षसँग छलफल थालेको छ । समितिको आन्तरिक कार्यविधिको मस्यौदा तयारी गरेर घटनाको अनुसन्धान थालिएको छानबिन समितिका संयोजक डा.पौडेलले जानकारी दिए । सो समितिले आज विहान चितवनका प्रमुख जिल्ला अधिकारी प्रकाश पौडेलसँग छलफल गरेको छ । आज नै सो समितिले निकुञ्जको मध्यवर्ती क्षेत्र व्यवस्थापन समितिका अध्यक्ष तथा पदाधिकारी, निकुञ्जका अधिकारी तथा नेपाली सेनासँग छलफल गर्ने समिति संयोजक डा.पौडेलले जानकारी दिए ।

सहसचिव डा पौडेलको नेतृत्वमा बनेको ५ सदस्यीय छानबिन समितिमा राष्ट्रिय निकुञ्ज तथा वन्यजन्तु संरक्षण विभागका वरिष्ठ अनुगमन तथा मूल्यांकन अधिकृत पुरुषोत्तम शर्मा, राष्ट्रिय निकुञ्ज तथा वन्यजन्तु आरक्ष निर्देशनालयका प्रमुख सेनानी गजेन्द्र रावल, वन तथा भू–संरक्षण विभागका वन अधिकृत सवनम पाठक र चितवन राष्ट्रिय निकुञ्ज कार्यालयका पशु चिकित्सक डा. दिनेश शाह रहेका छन् ।

गत साउनदेखि सौराहा क्षेत्रमा देखिन थालेको मकुनाले मानवीय क्षति भने गरेको थिएन । तर, सौराहाका व्यवसायीले पालेका पोथी हात्ती खोज्दै मकुना प्रायः जसो सौराहा क्षेत्रमा आउने गरेको थियो । घाँटीमा गोली हानेर सेनाले हात्ती मारेको घटनाको संरक्षणकर्मीहरुले विरोध गरेका छन् । जंगली भाले हात्ती मार्ने कामले सौराहाको हात्ती प्रजनन् केन्द्रलाई समेत असर गर्ने उनीहरुको तर्क छ ।