तनहुँ, मङ्सिर १८ गते । तनहुँको आँबुखैरेनी गाउँपालिका–१ स्थित आँधीमूललाई पर्यटकीय गन्तव्यका रूपमा विकास गर्न बाँध बाँधेर ताल बनाउने काम सुरु गरिएको छ । आँबुखैरेनी गाउँपालिकाले कृत्रिम ताल बनाउन सुरु गरेको हो । चालु आर्थिक वर्षमा ४० लाख रुपियाँ बजेट विनियोजन गरी ताल निर्माण सुरु गरिएको गाउँपालिकाका अध्यक्ष शुक्र चुमानले जानकारी दिनुभयो । अध्यक्ष चुमानले भन्नुभयो, “धार्मिक पर्यटकीय गन्तव्यका रूपमा विकास गर्न ताल निर्माण सुरु गरेका हौँ ।” 

अध्यक्ष चुमानका अनुसार चालु आवको अन्त्यसम्म तालले आकार लिने र दोस्रो चरणमा बाँकी पूर्वाधार निर्माण तथा तालको पानीबाट बिजुली निकाल्ने योजना रहेको छ । यहाँ रहेको मन्दिरमा पूजाआजा तथा घुम्नका लागि विभिन्न ठाउँबाट पर्यटक आउने गरेकाले ताल निर्माणपछि आन्तरिक पर्यटक वृद्धि हुने विश्वास गाउँपालिकाले लिएको छ । 

आँधीमूल धार्मिक तथा पर्यटकीय व्यवस्थापन समितिका अध्यक्ष हिमाल थापाले यहाँ भौतिक पूर्वाधारको थप, पहुँचमार्गको निर्माणलगायतले धार्मिक पर्यटक बढ्दै गइरहेको र ताल निर्माणपछि थप आकर्षण बढ्ने बताउनुभयो । थापाका अनुसार मन्दिर परिसरमा रहेको पोखरीमा जलदेवताका रूपमा विश्वास गरिने माछा छन् । पोखरीका माछा मरेमा अनिवार्य रूपमा काजकिरिया गर्नुपर्ने प्रचलन रहेको छ । माछा मरेमा पुजारीले खाल्डो खनेर अन्त्येष्टि गर्छन् । 

प्राचीनकालदेखि नै यहाँस्थित रुखको फेदमा आँधीमूल वाराहीको पूजा गरिँदै आएकोमा २०३५ सालमा स्थानीय पाकुली परियारको विशेष सक्रियतामा मन्दिर निर्माण गरिएको थियो । यहाँ हरिबोधनी एकादशीका दिन फूलको डोली ल्याएर विसर्जन गर्ने एवं मन्दिर परिसरमा तोरण टाँग्ने कार्य चलिआएको छ । 

जल, जङ्गल, जमिनलाई पुज्दै आएका स्थानीय मगर समुदायले खेतबारीमा बाली लगाउने र भित्र्याउने समयमा पनि पूजाआजा गर्ने गरेका छन् । आँधीमूल देवीको मन्दिरमा परेवा उडाउने र बलि दिने प्रचलन पनि छ । धार्मिक तथा पर्यटकीय स्थल भएकाले पूजाअर्चनाका साथै वनभोजका लागि पनि टाढा टाढाबाट आउने गरेका छन् । प्यागोडा शैलीको मन्दिर, पार्क, दुई पोखरी र माछाको आकृतिका धारालगायतका संरचनाले यहाँको सुन्दरतामा पर्यटक आकर्षित हुने गरेको अध्यक्ष थापाले बताउनुभयो ।