स्याङदी । शहर बजारमा अहिले स्मार्ट कक्षाको अवधारणा अनुसार पठन पाठन सुरु भैसक्यो । तर ग्रामिण भेगका विद्यालयहरुमा भने अहिले पनि स्मार्ट कक्षाको कुरा त परको कुरा राम्रोसँग बसेर पढ्न पाउने अवस्थामा समेत छैन । यस्तै मध्यको एक हो, चितवनको इच्छाकामना गाउँपालिका वडा नं. ७ स्थित चण्डेश्वरी आधारभुत विद्यालयका साना कक्षाका विद्यार्थीहरु । उनीहरु यो कठ्याङ्ग्रीदो चिसो मौसममा पनि सिमेन्टको चिसो भुइमा बसेर पढ्न बाध्य भएका छन् । विद्यालयमा कक्षा १ र शिशुमा अध्ययनरत विद्यार्थीहरु विद्यालयमा चकटी समेत पर्याप्त नहुदाँ चिसो भुइमा बसेर पढ्न बाध्य भएका हुन् ।

विद्यार्थी संख्या धेरै भएको तर त्यो अनुसार चकटीको व्यवस्थापन हुन नसक्दा साना नानीबाबुहरुलाई भुईमै राखेर पठाउन बाध्य भएको विद्यालयका प्रध्यानाध्यापक निशा गुरुङले जानकारी दिए । उनका अनुसार विद्यालयमा दुई वटै कक्षामा गरेर ५९ जना विद्यार्थीहरु छन् तर उनीहरुको लागि विद्यालयमा २०–२२ वटा मात्र चकटी उपलब्ध रहेको छ ।

विद्यालयले शिक्षक अभाव भएका कारण शिशु कक्षा र १ कक्षाका विद्यार्थीहरुलाई एकै ठाउँमा राखेर पढाउने गरेका छन् । जसका कारण एकातिर कक्षाकोठा साघुरो बनेको छ भने विद्यार्थीको लागि आवश्यक चकटी नहुदाँ चिसो भुइमै बसेर पढ्नुपर्ने बाध्यतामा साना नानीबाबुहरु रहेका छन् । 

यद्यपी घाम लागेको बेला भने बाहिर खुला स्थानमा राखेर पढाउने गरिएको प्रध्यानाध्यापक गुरुङले बताइन् । घाम नलागेको बेला भने चिसोमै राख्नुपर्ने बाध्यता रहेको उनले बताईन् ।

हास्दै खेल्दै रमाउदै पढ्न पाउनुपर्ने बेला यसरी चिसो भुईमा बसेर पढ्नुपरेपछि विद्यार्थीले केही सिक्ने त के कुरा उल्टै साना बालबालिकाहरुलाई चिसोले बिरामी बनाउने जोखिम बढि हुन्छ । सम्बन्धित निकायले बेलैमा ध्यान पु¥याउन जरुरी देखिन्छ । 

विद्यालयमा गुरुङ, चेपाङ र मगर समुदायका विद्यार्थीहरु अध्ययनरत छन्।