पुस १६, १७ र १८ गते इच्छाकामनामा पहिलो पटक सुन्तला महोत्सव हुदै

इच्छाकामना न्युज

१२, पौष २०८०

पुस १६, १७ र १८ गते इच्छाकामनामा पहिलो पटक सुन्तला महोत्सव हुदै

कुरिनटार । चितवनको इच्छाकामना गाउँपालिकामा पहिलो पटक यहि पुस १६ गतेदेखि सुन्तला महोत्सव हुने भएको छ । गाउँपालिकाको आयोजनामा वडा नं. ३ स्थित तोक्दाङ, ढाप, माझगाउँ, सिरानगाउ, डोडे लगायतका गाउँहरुलाई समेटेर सुन्तला महोत्सव हुन लागेको हो । महोत्सव ३ दिनसम्म चल्नेछ ।

स्थानीय सुन्तला किसानले उत्पादन गरेको सुन्तलालाई बजारीकरण तथा प्रोत्साहनका लागि गाउँपालिकाले पहिलो पटक सुन्तला महोत्सव आयोजना गरिएको गाउँपालिका अध्यक्ष दान बहादुर गुरुङले जानकारी दिनुभयो । गाउँपालिकाले गाउँपालिका भित्रका अधिक सुन्तला उत्पादन हुने गाउँहरुलाई समेटेर सुन्तला महोत्सवको आयोजना गरिएको उहाँले बताउनुभयो । साथै सुन्तला महोत्सवमा पाहुनाहरुलाई आकर्षणका लागि बोटमै टिपेर सुन्तला खानपाउने, सुन्तला कसले धेरै खाने प्रतियोगिता, बजारमा भन्दा सहुलियत मूल्यमा ताजा सुन्तलाको स्टल राखिने जस्ता क्रियाकलापहरु गरिनुका साथै महोत्सवमा आउने पाहुनाहरुको लागि सशुल्क खाने बस्नेको समेत व्यवस्था गरिने उहाँले बताउनुभयो ।

महोत्सवको अवसरमा सुन्तला कृषकहरुलाई विभिन्न सामाग्री वितरण गर्ने, दक्ष कृषि प्राविधिकहरुद्वारा रोगव्याथी सम्बन्धि तालिमहरु दिने काम पनि महोत्सवमा हुने उहाँले बताउनुभयो ।