भरतपुर । राष्ट्रिय स्वतन्त्र पार्टी (रास्वपा)का सभापति रवि लामिछानेले सांसदको रूपमा निर्वाचित भएको एक सय दिनमा आफूले गरेका काम र नयाँ योजना सार्वजनिक गरेका छन् । आफू निर्वाचित क्षेत्रलाई सुन्दर र सुव्यवस्थित क्षेत्र बनाउने परिकल्पनासहितका योजना घोषणा गरेका हुन् । उनले घोषणा गरेका योजनाभित्र नमुना विद्यालय, स्वस्थ चितवन, ब्लु बस सञ्चालन, निःशुल्क स्वास्थ्य बीमा कार्यक्रम, सय दिनमा सय जनालाई रोजगारीलगायतका विषय प्राथमिकतामा परेका छन् ।

पूर्व उपप्रधान तथा गृहमन्त्रीसमेत रहिसकेका नेता लामिछानेका अनुसार भरतपुर–नारायणगढ क्षेत्रमा अबदेखि एउटा ब्लु बस सञ्चालन हुनेछ । अहिले सुरुवाती चरण भएको हुँदा एउटा बसबाट अभियान सुरु गरिने उनको भनाइ छ । उक्त बसमा सकेसम्म चालकसमेत महिला नै राख्ने गरी महिलाहरूका लागि सञ्चालन गर्न खोजिएको उनले बताए ।

चितवनका सामुदायिक विद्यालयलाई नमुना विद्यालय बनाउनको लागि शक्तिखोरको चतुर्मुखी माध्यमिक विद्यालय र भरतपुरको रामनगर माध्यमिक विद्यालयमा काम सुरु भइसकेको उनले बताए । यस्तै इच्छाकामनाको वडा नं.१ मा पर्ने भाराङस्थित राष्ट्रिय आधारभूत विद्यालयलाई पनि नमुना विद्यालयको रूपमा विकास गरी हाल कक्षा ७ सम्म पढाइ हुँदै आए पनि कालन्तरमा आसपासका बालबालिकाको लागि कम्तिमा माध्यमिक तहसम्मको पढाइ सञ्चालन गर्ने गरी तयारी गरिरहेको उनले बताए ।

निःशुल्क स्वास्थ्य बीमा कर्यक्रमको लागि पाँच सय जनाको लक्ष्य रहेकोमा एक सय जनाको बीमा भइसकेको उनले बताए । आमनागरिकका लागि चुनावका बेला मतदातासँग गरेका बाचा पूरा गर्ने लक्ष्यसहित काम गर्ने प्रयास गरिएको उनले बताए । आफू संघीय सांसद भएको हिसाबले कतिपय काम आफ्नो मातहतमा नरहेको हुँदा सम्बन्धित क्षेत्र या तहसँग समन्वय गरेर पूरा गर्ने उनले बताए ।

आफूले चुनाव जित्दा ल्याएको ५४ हजार १७६ मतको आधारमा सोही मतबराबरको बिरुवा रोप्नेसमेत उद्घोष गरेका छन् । ‘कम्तिमा एक जना मतदाताको नाममा एउटा बिरुवा रोप्न त सकिन्छ नि,’ उनले भने । त्यसबाहेक हरेक चारचार महिनामा सार्वजनिक सुनुवाइ गरेर जनताका समस्या र गुनासा सहितको सुझाव सुन्ने र आफूले गरेका काम पनि जनतासामु प्रस्तुत गर्ने उनले बताए । सोहीअनुसार आउँदो भदौ १० गते सार्वजनिक सुनुवाइ गर्ने तयारी भइरहेको उनले बताए ।