भुम्लिचोक । गोरखाको गण्डकी गाउँपालिकाले आगामी आर्थिक वर्ष २०८०।८१ को लागि करिब पौने ६२ करोड रुपैयाँ बराबरको अनुमानित बजेट प्रस्तुत गरेको छ । आईतबार गाउँपालिकाको १३ औँ गाउँसभामा उपाध्यक्ष ललिता अधिकारीले आगामी आर्थिक वर्षको लागि ६१ करोड ७२ लाख ४ हजार १ सय रुपैयाँको बजेट प्रस्तुत गरेको हो । 

गाउँपालिकाले आगामी आर्थिक वर्षको लागि प्रस्तुत गरेको बजेट चालु आवमा भन्दा ४ करोड ३९ लाख ९४ हजार ५ सय ८२ रुपैयाँ कम रहेको छ । चालु आवमा पालिकाको बजेट ६६ करोड ११ लाख ९८ हजार ६ सय ८२ रुपैयाँको थियो ।

प्रस्तुत बजेट अनुसार संघीय सरकार वित्तिय समानीकरण अनुदान  १२ करोड ९४ लाख, संघीय सरकार शसर्त अनुदान २८ करोड ९ लाख, संघीय समपुरक अनुदानतर्फ १ करोड ७५ लाख र संघीय विशेष अनुदान १ करोड ४० लाख, संघीय सरकार राजस्व बाँडफाँट ८ करोड ७७ लाख ९७ हजार १ सय गरी जम्मा ५२ करोड ९५ लाख ९७ हजार १ सय बजेट प्रस्ताव गरिएको छ । यस्तै प्रदेश सरकार वित्तिय समानीकरण अनुदान १ करोड ८३ लाख १९ हजार, प्रदेश सरकार शसर्त अनुदान ६० लाख, र प्रदेश सरकार समपुरक अनुदान रु ५० लाख, प्रदेश सरकार राजश्व बाँडफाड ८० लाख ३८ हजार गरी ३ करोड ७३ लाख ५७ हजार प्राप्त हुने अनुमानित बजेट प्रस्ताव गरेको हो । पालिकाले आगामी आर्थिक वर्षमा आन्तरिक राजस्वतर्फ २ करोड २ लाख ५० हजार अनुमान गरेको छ भने मौज्दात तर्फको ३ करोड बाकी मौज्दात रहेका जनाएको छ । 

मुख्यगरी गाउँ पालिकाले बजेट व्यहोर्ने स्रोतका रूपमा आन्तरिक राजस्व, अन्तर सरकारी राजस्व बाँडफाँड तथा संघ र प्रदेशबाट प्राप्त हुने अनुदान रकमलाई आधार बनाएर बजेट सार्वजनिक गरिएको गाउँ पालिका अध्यक्ष दीपक तिम्लिसिनाले जानकारी दिनुभयो । 

अध्यक्ष तिम्लिसिनाले आगामी आर्थिक वर्षको बजेट मुख्य गरी कृषि र स्वास्थ्यमा केन्द्रित गरेर बजेट ल्याइएको बताए । जसअन्तर्गत कृषि उत्पादनलाई जोड दिँदै कृषि एम्बुलेन्स सञ्चालन गर्ने, स्वास्थ्यको हकमा सुत्केरी अशक्त र विपन्न नागरिक हरूको लागि निःशुल्क एम्बुलेन्स सञ्चालन गरिने छ ।

भौतिक निर्माणतर्फ वडा गौरवको आयोजना सञ्चालन गर्ने र त्यसमा ८ वटै वडाका लागि ५० लाखको दरले वडा गौरव आयोजनाले यस वर्ष पनि निरन्तरता पाएको अध्यक्ष तिम्लिसिनाले बताए । बजेटले पालिकाको समग्र क्षेत्रलाई समेट्ने प्रयास गरेको छ।