प्रदेश सरकारको बजेटमा आँबुखैरेनी : ट्रमा अस्पताल स्थापनाको लागि बजेट व्यवस्था

इच्छाकामना न्युज

२, आषाढ २०८०

प्रदेश सरकारको बजेटमा आँबुखैरेनी : ट्रमा अस्पताल स्थापनाको लागि बजेट व्यवस्था

पोखरा । तनहुँको आँबुखैरेनी गाउँपालिकाले गाउँपालिकामा ट्रमा अस्पताल स्थापनाको लागि गरिरहेको पहलले अन्ततः सार्थकता पाउने सम्भावना बढेको छ । बिहिबार गण्डकी प्रदेश सरकारले आर्थिक वर्ष २०८०।०८१ को प्रस्तुत गरेको बजेटमा तनहुँमा ट्रमा सेन्टर स्थापना गर्न बजेट व्यवस्था गरेको उल्लेख छ । यो सँगै आँबुखैरेनीमा ट्रमा अस्पताल स्थापनाको सम्भावना बढेको हो ।

गाउँपालिका अध्यक्ष शुक्र चुमान निर्वाचित भएर आएसँगै ट्रमा अस्पताल स्थापनाको लागि प्रदेश र केन्द्र सरकारसँग पहल गरिरहेको थियो । केन्द्र सरकारले प्रस्तुत गरेको आर्थिक वर्ष २०८०।०८१ को बजेटमा नसमेटिएको भए पनि प्रदेश सरकारले भने यसका लागि सम्बोन्धन गरेको छ ।

अस्पताल स्थापनाको लागि प्रदेश सरकारले सम्बोन्धन गर्ने भएपछि आफ्नो पहलले सफलता पाउन लागेको गाउँपालिका अध्यक्ष शुक्र चुमानले बताए । ‘ट्रमा अस्पताल सञ्चालनमा आउन सके राजमार्गमा हुने दुर्घटनाको क्षतिमा न्युनिकरण गर्न सक्ने देखिन्छ, यसैले हामीले पहल गरेका हौं’ –उनले भने । आउने दिनमा केन्द्र सरकारले समेत सहयोग गर्ने अपेक्षा गरिएको उनले बताए।

गाउँपालिकाले वडा नं. १ स्थित सत्रसयमा १०० बेडको ट्रमा अस्पताल सञ्चालनको लागि पहल गरिरहेको हो ।