आँबुखैरेनीको खानीखोला क्षेत्रको बस्ती जोगाउन तटबन्ध निर्माण

पत्रपत्रिका

१, आषाढ २०८०

आँबुखैरेनीको खानीखोला क्षेत्रको बस्ती जोगाउन तटबन्ध निर्माण

आँबुखैरनी । तनहुँको आँबुखैरेनी गाउँपालिका २ स्थित खानीखोला क्षेत्रका बस्ती जोगाउन तटबन्धन निर्माण भएको छ । भू तथा जलाधार व्यवस्थापन कार्यालय र मुग्लिन पोखरा पूर्वी सडक आयोजनाको संयुक्त सहयोगमा तटबन्ध निर्माण गरेको हो । तटबन्ध कार्यपश्चात त्यस क्षेत्रका झन्डै ७० घरधुरीको संरक्षण भएको वडाध्यक्ष आशबहादुर गुरूङले बताए । वर्षायाम सुरू भएसँगै त्यस क्षेत्रका मानिस रातभर जाग्राम बस्नुपर्ने बाध्यता रहेकाले तटबन्ध निर्माणपश्चात समस्या हटेको उनले बताए ।

आर्थिक वर्ष २०७९।०८० मा गण्डकी प्रदेश सरकार पूर्वमन्त्री हरिबहादुर चुमानको पहलमा बस्ती संरक्षणका लागि ८ लाख विनियोजन भएको हो । वडाध्यक्ष गुरूङको पहलमा मुग्लिन–पोखरा पूर्वी सडक आयोजनाले १२० र गण्डकी प्रदेश सरकारले ५० मिटर तटबन्ध गरेको खानीखोला तटबन्धन निर्माण उपभोक्ता समितिका अध्यक्ष कृष्णविक्रम थापाले बताए ।

उक्त क्षेत्रमा करिब १५ मिटर गहिराइ र ३० मिटर उचाइको पर्खाल निर्माण गरिएको छ । उनले भने खोलामा आउने बाढीबाट कटान रोक्न पर्खाल लगाएका र नलगाएका क्षेत्रमा ठूलाठूला ढुङ्गा राख्ने योजना बनाएका छौं ।ू

आँबुखैरेनी गाउँपालिकाका अध्यक्ष शुक्र चुमानको पहलमा प्रदेश सरकारले आर्थिक सहयोग गरेको हो । उक्त क्षेत्रमा अझै संरक्षण गर्नुपर्ने भएकाले सम्बन्धित निकायसँग समन्वय गरी काम गर्ने योजना बनाइएको गाउँपालिकाका अध्यक्ष चुमानले जानकारी दिए । आजको भञ्ज्याङ दैनिकबाट