कृषि ज्ञानकेन्द्र तनहुँद्वारा आँबुखैरेनी स्थित खस्राङ गाउँका किसानलाई अनुदानमा मौरी सहितको घार वितरण

इच्छाकामना न्युज

२३, जेठ २०८०

कृषि ज्ञानकेन्द्र तनहुँद्वारा आँबुखैरेनी स्थित खस्राङ गाउँका किसानलाई अनुदानमा मौरी सहितको घार वितरण

आँबुखैरेनी । तनहुँको आँबुखैरेनी गाउँपालिका वडा नं. ४ खस्राङ गाउँका किसानलाई अनुदानमा मौरी सहितको घार वितरण गरेको छ । कृषि ज्ञान केन्द्र तनहुँको ९० प्रतिशत अनुदानमा आज मौरी सहितको घार वितरण गरेको हो ।

कार्यालयले आज गाउँमै पुगेर एक कार्यक्रमको आयोजना गरि खस्राङ गाउँ कृषक समूहमा आवद्ध रहेका किसानहरुलाई मौरी सहितको घार वितरण गरिएको कृषि ज्ञान केन्द्र तनहुँका कार्यालय प्रमुख कुल प्रसाद तिवारीले बताए । उनका अनुसार समूहमा आवद्ध २६ जना कृषकहरुको लागि ४६ थान मौरी सहितको घार, स्ट्याण्ड, पन्जा, धुवादानी, टोपीका साथै महदानी समेत वितरण गरिएको थियो । यसका लागि कार्यालयले ५ लाख रुपैयाँ खर्च गरिएको उनले बताए ।

यस्तै मौरी घार वितरण कार्यक्रमलाई सम्बोन्धन गर्दै आँबुखैरेनी ४ का वडाध्यक्ष मिलन भुजेलले किसानहरुले प्राप्त गरेको मौरी सहितको घारबाट मह उत्पादन गरेर उनीहरुको आयआर्जनमा वृद्वि गर्न टेवा पुर्‍याउने अपेक्षा लिएको बताए । उनले किसानहरुलाई अहिले वितरण गरेको मौरी सहितको घारलाई थप बढाएर व्यावसायीकीकरण गर्न आग्रह गरे । साथै उनले वडाका साथै गाउँपालिकाले खस्राङ गाउँलाई मह पकेटको क्षेत्रको रुपमा विकास गर्न चाहेकोले सबै किसानहरुले व्यावसायीक मौरी पालनमा जोड दिनुपर्ने बताए ।

कार्यक्रममा वडा नं. ४ का वडाध्यक्ष मिलन भुजेल, वडासदस्य प्रेम गुरुङ, कृषि ज्ञान केन्द्र तनहुँका कार्यालय प्रमुख कुल प्रसाद तिवारी लगायतको उपस्थिति रहेको थियो ।