घैरुङ । गोरखाको शहिद लखन गाऊँपालिकाले कृषकहरुलाई उत्पादनमा आधारित अनुदान वितरण कार्यक्रम सुरु गरेको छ । पालिकाले केही साता अघिमात्रै उत्पादनमा आधारित अनुदान वितरण सम्बन्धी कार्यविधि पारित गरी कार्यक्रम सुरु गरेको हो ।

कार्यविधिअनुसार वडा नम्वर ३ रामशाहघाटको हाटबजारमा कृषि उपज बिक्रीका लागि ल्याउने किसानहरुलाई उनीहरुले गरेको उत्पादनका आधारमा अनुदान वितरण गरिएको हो । स्थानीय नयाँपुल कृषि उपज उपभोक्ता सहकारी संस्थाले सञ्चालन गर्दै आएको हाटबजारमा बिक्रीका लागि ल्याएको कृषि उत्पादनको परिमाणका आधारमा प्रतिकिलो २ रुपैयाँका दरले अनुदान दिइएको गाऊँपालिकाको कृषि शाखाका प्रमुख ऋषि रोकाले बताए । पहिलो चरणमा गोलभेंडा, करेला, काउली, चिचिण्डा र घिरौंला उत्पादन गर्ने कृषकलाई अनुदान दिइएको उनले जानकारी दिए ।

पाँचवर्षदेखि सञ्चालनमा रहेको हाटबजारमा बिक्रीका लागि ल्याइने कृषि उत्पादनको परिमाण घट्दै गएको पाइएकाले आसपासका किसानलाई प्रोत्साहित गर्न त्यहीँबाट अनुदान वितरण सुरु गरिएको रोकाको भनाइ छ । नियमित रुपमा हाटबजारमा कृषि उत्पादन बिक्रीका लागि ल्याउने ४२ जना किसानलाई उत्पादनमा आधारित अनुदान र कृषि उपज ढुवानी अनुदान उपलब्ध गराइएको हो ।

किसानले प्रतिकिलो दुई रुपैयाँका दरले घटिमा तीनसयदेखि बढिमा पाँचहजार छसय रुपैयाँसम्म अनुदान पाएका छन् । किसानलाई अनुदान वितरण गर्दै गाऊँपालिकाका अध्यक्ष रमेश थापामगरले आगामी वर्षहरुमा पालिकाका सबै वडामा उत्पादनमा आधारित अनुदान कार्यक्रम विस्तार गरिने बताए ।

अहिले ५ प्रकारको तरकारी बालीमा मात्रै अनुदान दिइएकोमा अब अन्य कृषि उपज र पशु चौपाया उत्पादनको आधारमा पनि अनुदान दिइने उनको भनाई छ । कृषकहरुले उचित मूल्य प्राप्त गर्न नसक्ने तर बिचौलियाले प्रशस्त मुनाफा लिने परिपाटीको अन्त्यका लागि पालिकाका अन्य ठाऊँमा पनि हाटबजार सञ्चालन गर्ने लक्ष्य रहेको अध्यक्ष थापामगरले जानकारी दिए ।

टाठाबाठाले कागजपत्र मिलाएर कृषि अनुदान लिने तर उत्पादनमा नलाग्ने लगायतका कृषि क्षेत्रका विकृति अन्त्य गर्नसकेमात्रै पनि कृषि उत्पादनमा देशलाई आत्मनिर्भर बनाउन सहयोग पुग्ने उनले बताए । बजारको मागको लेखाजोखा गरेर कृषि उत्पादन गर्न पनि उनले किसानलाई आग्रह गरे । सोही कार्यक्रममा किसानहरुलाई बिऊविजन पनि वितरण गरिएको छ ।

यस्तै रामशाहघाटस्थित हाटबजारमा नियमित रुपमा कृषि उपज बिक्रीका लागि ल्याउने कृषकहरु वडा नम्वर २ का इन्द्रकुमारी थापा, सविता नेपाली, आशाकुमारी गुरुङ र मनकामना कृषक महिला समूहलाई पुरस्कृत गरिएको छ ।

नयाँपुल कृषि उपज उपभोक्ता सहकारी संस्थाका अध्यक्ष ऋषि वयलकोटीको अध्यक्षतामा भएको कार्यक्रममा वडा नम्वर २ का अध्यक्ष सकुन थापा, ३ का अध्यक्ष दिपक पाण्डे, गाऊँपालिका कृषि शाखाका प्रमुख ऋषि रोका, गोरखा नगरपालिका वडा नम्वर ३ का अध्यक्ष मित्राकुमारी परियार, सहमति नेपालका कृषि प्राविधिक भूमिप्रसाद दाहाल, वडा नम्वर २ का वडा सदस्यहरु झक्कल थापा, ऋषिराम कट्टेल, रेक्सना थापा, साना किसान कृषि सहकारी संस्थाका अध्यक्ष कृष्णबाबु थापा, सहकारीकी कोषाध्यक्ष कल्पना बयलकोटीले मन्तब्य ब्यक्त गरेका थिए ।