कार्यालय सहायकको किर्ते हस्ताक्षर गरि रकम हिनामिना गर्ने आरोपित कर्मचारीद्वारा अपराध स्वीकार

इच्छाकामना न्युज

२५, फाल्गुण २०७९

कार्यालय सहायकको किर्ते हस्ताक्षर गरि रकम हिनामिना गर्ने आरोपित कर्मचारीद्वारा अपराध स्वीकार

कुरिनटार । चितवनको इच्छाकामना गाउँपालिकामा किर्ते काण्डमा मुछिएका तीनै जना कर्मचारीहरुले अपराध स्वीकार गरेका छन् । आज गाउँपालिकामा पीडित कर्मचारी र जनप्रतिनिधिहरुसँग उनीहरुले आफ्नो अपराध स्वीकार गरेका हुन्।

एक कार्यक्रमको शीर्षकमा तत्कालिन प्रमुख प्रशासकिय अधिकृत शालिकराम बस्याल, योजना शाखाका प्रमुख सविता अर्याल र लेखा प्रमुख पवन खरेलले सात जना वडाका कार्यालय सहायक कर्मचारीहरुको किर्ते दस्तखत गरि रकम हिनामिन गरेको आरोप लागेको थियो ।

घटनाको सन्दर्भमा पिडित कर्मचारी, आरोपित कर्मचारी, जनप्रतिनिधि, निवर्तमान जनप्रतिनिधि लगायत बसेर आज गरिएको छलफलमा आरोपित कर्मचारीहरुले आफ्नो अपराध स्वीकार गरेको गाउँपालिका अध्यक्ष दान बहादुर गुरुङले बताए । उनका अनुसार हाल उक्त काण्डका आरोपित तत्कालिन लेखा प्रमुख रहेका लेखाका कर्मचारी पवन खरेललाई गाउँपालिकाले कार्यालयको नियमित काममा रोक लगाइएको छ ।

यस्तै तत्कालिन प्रमुख प्रशासकिय अधिकृत शालिकराम बस्याल र योजना प्रमुख सविता अर्याल भने सरुवा भइसेका छन् । कानुनी कारबाहीका लागि गाउँपालिकाको तर्फबाट गर्न पर्ने सम्पूर्ण प्रकृयामा सहयोग हुने अध्यक्ष गुरुङको भनाई छ ।

यता प्रमुख प्रशासकिय अधिकृत जगतप्रसाद भुसालले यस अनियमितताका बारेमा छानबिनका लागि सम्बन्धी माथिल्लो निकायमा पत्राचार गरिने बताए ।