कुरिनटार । चितवनको इच्छाकामना गाउँपालिकाले ठेक्का पारेर पनि समयमा काम नगर्ने ठेकेदार कम्पनीलाई धमाधाम कालो सूचीमा पार्न थालेको छ । करिब २ महिना अघि मात्रै ३ कम्पनीलाई कालोसूचीमा पारेको इच्छाकामनाले फेरी अर्को कम्पनीलाई कालोसूचीमा पारेको छ । 

गाउँपालिकाले भरतपुर ४ चितवनको इन्जिनियर्स कन्स्ट्रक्सन एण्ड माइन्ट क्राफ्ट प्रालिलाई कालोसूचीमा पारेको हो । उक्त कम्पनीले २०७८ असार मसान्तसम्ममा सम्पन्न गर्ने गरी इच्छाकामना ३ को माझगाउँ बर्थिङ सेन्टर निर्माण गर्ने काम पाएको थियो । कम्पनीले निर्माण गर्ने अवधि सम्पन्न हुदाँसम्म पनि काम सुरु नै नगरेपछि कालोसूचीको लागि सिफारिश गरि पठाईएको गाउँपालिकाका प्राविधिक शाखा प्रमुख इन्जिनियर कृष्ण उपाध्यायले बताए । काम नगरी अलपत्र पार्ने अन्य कम्पनीलाई समेत कालोसूचीमा राख्ने तयारी भैरहेको उनले बताए ।

गाउँपालिकाले दिएको जानकारी अनुसार इच्छाकामनामा १ दर्जन भन्दा बढि योजनाका कामहरु ठेकेदारले समयमा निर्माण सम्पन्न नगर्दा अलपत्र परेको छ । ठेकेदारले विकाश निर्माणको काममा ढिलाई गरिदिदा गाउँपालिकाको विकाशमा असर पर्ने भएकोले बदमासी गर्ने ठेकेदार कम्पनीहरुलाई कारबाही स्वरुप कालोसूचीमा राख्न थालिएको गाउँपालिका अध्यक्ष दान बहादुर गुरुङले बताए । ‘अब हामी कहाँ काम जिम्मा लिएर अलपत्र पार्ने कसैलाई पनि छुट छैन’ उनले भने ।

इच्छाकामना गाउँपालिकाको सिफारिशमा यहि पुस १३ गते मात्रै ३ वटा कम्पनीलाई सार्वजनिक खरिद अनुगमन कार्यालयले कालोसूचीमा राखेको छ । जसमा माधवबहादुर घिमिरे मुख्य व्यक्ति रहेको इच्छाकामना–४, कुरिनटारको श्री डिभी घिमिरे कन्ट्रक्सन, पुस्करप्रसाद गौतम मुख्य व्यक्ति रहेको भरतपुरको श्री अञ्जना निर्माण सेवा र प्रकाश कोइराला मुख्य व्यक्ति रहेको निलकण्ठ–८, धादिङको श्री जलेश्वर निर्माण सेवा रहेको छ । उनीहरु सबैलाई एक वर्षसम्म कुनैपनि सरकारी सार्वजनिक खरिदमा सहभागी हुन नपाउने गरी कालोसूचीमा राखिएको हो ।