चितवन । भरतपुर महानगरपालिकाले साना विद्यार्थीलाई न्यानो कपडा वितरण गरेको छ। अत्याधिक चिसो बढेसँगै महानगरपालिकाभित्रका साना विद्यार्थीलक्षित कार्यक्रम सुरु गरिएको हो। सुरुवाती चरणमा बिहीबार भरतपुर महानगरपालिकाको वडा नम्बर २८ स्थित आधारभूत विद्यालय सीसाबासबाट न्यानो कपडा वितरणको कार्यक्रम थालेको हो। महानगर प्रमुख प्रमुख रेनु दाहालले कार्यक्रमको सुरुवात गरेकी हुन्। 

उक्त कार्यक्रमले भरतपुरको शिक्षालाई थप गुणस्तरीय बनाउनमा टेवा पुग्ने नगर प्रमुख दाहालले बताइन्। चिसोका कारण विद्यालय जानबाट वञ्चित नहोस् भन्ने उद्देश्यले कक्षा १ देखि ५ सम्मका विद्यार्थीलाई न्यानो कपडा वितरण गरिएको उनको भनाइ छ।

महानगरपालिकाका शिक्षा शाखा प्रमुख महेन्द्रप्रसाद पौडेलका अनुसार पहिलो चरणको न्यानो कपडा वितरण कार्यक्रममा साना विद्यार्थीहरुलाई एक थान ट्रयाक सुट र ऊनको टोपी वितरण गरिएको हो। यसवर्ष एक हजार ५०० विद्यार्थीलाई न्यानो कपडा वितरण गर्ने कार्यक्रम रहेको उनले बताए। महानगरले बिहीबारमात्रै ९८६ जना विद्यार्थीलाई न्यानो कपडा बाँडेको छ। 

भरतपुर–६ को देवज्योति आधारभूत विद्यालयका ११४, वडा नम्बर १३ को आधारभूत विद्यालय ब्रहमपुरीका ५८, वडा नम्बर १७ को आधारभूत विद्यालय लगौटाका १२२, १८ को आधारभूत विद्यालय भवनवस्तीका ११३ जना विद्यार्थीले न्यानो कपडा पाए।

यस्तै वडा नम्बर २१ को आधारभूत विद्यालय रंगीलाका ८९ तथा आधारभूत विद्यालय सीतापुरका ३४ जना विद्यार्थीले पनि न्यानो कपडा पाए। यस्तै वडा नम्बर २३ को आधारभूत विद्यालय घैलाघारी, वडा नम्बर २६ को जनमासिंह आधारभूत विद्यालयका ५० र वडा नम्बर २७ को काजीमान आधारभूत विद्यालयका ८४ जनाले पनि न्यानो कपडा पाएका छन्।

महानगरभित्र ११६ वटा सामुदायिक विद्यालय छन् भने ९७ वटा संस्थागत विद्यालय छन्। ७३ वटा आधारभूत तहका विद्यालय छन्। महानगरले विगत ४ वर्षदेखि विद्यार्थीलाई न्यानो कपडा सहयोग गर्दै आएको छ।