सुसिला श्रेष्ठ, काठमाडौँ । नेपालमा लैङ्गिक हिंसाका घटना बर्सेनि बढ्दै गएको छ । महिला पुनस्र्थापना केन्द्रमा मात्रै १ वर्षमा १ हजार ८ सय १३ लैङ्गिक हिंसाको उजुरी दर्ता भएको छ । जसमा महिला माथि हुने घरेलु हिंसा सबैभन्दा बढी ६६ प्रतिशत छन् । अनौपचारिक क्षेत्र सेवा केन्द्र इन्सेकले पछिल्लो १० वर्षमा अभिलेख गरेका लैङ्गिक हिंसाका घटनामध्ये ४९ प्रतिशत महिला अधिकार उल्लङ्घन र यस वर्ष इन्सेकले अभिलेख गरेका मानव अधिकार उल्लङ्घनका घटनामध्ये ६० प्रतिशत घटना महिला हिंसाका छन् ।

यसले नेपालमा लैङ्गिक हिंसा वार्षिक रूपमा बढ्दै गएको देखिएको छ । राष्ट्रिय महिला आयोगमा पनि उजुरी बर्सेनि बढिरहेको छ । तर सङ्घीय संरचना अनुसार आयोगका कार्यालयहरूको स्थापना हुन नसक्दा न्याय निरुपण प्रभावित बनेको आयोगका प्रवक्ता चमिला भट्टराईले बताउनुभयो । इन्सेकको लैङ्गिक हिंसाको विश्लेषणात्मक अध्ययन प्रतिवेदनले लैङ्गिक हिंसामा परेका २२ प्रतिशत महिलाले मात्र सहयोग लिन तत्परता देखाउने गरेका छन् । ६६ प्रतिशत महिलाले कसैलाई नभनि हिंसा सहेर बसेको देखिएको छ ।

न्यायको सरल पहुँच नहुनु तथा न्याय प्रक्रिया नै लामो हुनुले पनि महिलाहरू हिंसा विरुद्ध बोल्नुभन्दा सहेर बस्ने गरेका छन् । जस कारण कति महिला हिंसामा परे भन्ने तथ्याङ्क अझैसम्म आउन नसकेको राष्ट्रिय मानव अधिकार आयोगका मानव अधिकार अधिकृत कल्पना आचार्यले बताउनुभयो ।नेपालले राष्ट्रिय र अन्तर्राष्ट्रियस्तरमा लैङ्गिक हिंसा अन्त्य गर्ने प्रतिवद्धता व्यक्त गरेको छ भने आगामी २ वर्षमा लैङ्गिक हिंसा ५ प्रतिशतमा झार्ने सरकारको लक्ष्य छ । तर लैङ्गिक हिंसाका उजुरी तथा घटनामध्ये झण्डै ८० प्रतिशत घरेलु हिंसा हुने गरेको छ ।