मोरङ । माओवादी केन्द्रका केन्द्रीय सदस्य तथा प्रतिनिधि सभा निर्वाचनका उम्मेदवार अमनलाल मोदीलाई ‘१० वर्ष सांसद भएर के के विकास गर्नुभयो ?’ भनेर प्रश्न गर्ने विद्यार्थी कुटिएका छन्।

मोरङको कटहरी–३, चम्राहीमा पढाइ भइरहेको मदरसामा बुधबार आयोजित चुनावी सभामा उम्मेदवारलाई प्रश्न गर्ने २१ वर्षीय शंकरकुमार साफीलाई नेताका समर्थकले पिटेका थिए। सत्तापक्षीय गठबन्धनको सभामा उम्मेदवार अमनलाल मोदीले मन्तव्य राखेपछि साफीले ‘१० वर्ष सांसद भएर के के विकास गर्नुभयो ?’ प्रश्न गरे।

सुनसरी कोशी गाउँपालिका–७, हरिपुर घर भई कटहरीमा डेरामा बसेर उनले दैनिक ६० जना विद्यार्थीलाई ट्यूशन पढाउँदै आएका छन्। साफीले भने, “वडाध्यक्ष जदुलाल कामत सहितका चार–पाँच जनाले कुटपिट गर्दै कार्यक्रमबाट बाहिर निकाले ।” उनलाई प्रश्न सोधेको निहुँमा कुटिएको थियो।

साफीले भने, “पिट्दापिट्दै उनीहरूले सोधे–फेरि प्रश्न गर्छस् ? मैले गर्छु भनें।” उनको जवाफपछि पुनः लछारपछार पार्दै कार्यक्रमस्थलमै लगिएको थियो। कुटिएपछि माओवादीका केन्द्रीय सदस्य समेत रहेका उम्मेदवार मोदीले चिया खान र गफ गर्न आग्रह गर्दा साफीले अस्वीकार गरे। विज्ञान सङ्कायमा स्नातकको पढाइको तयारी गर्दै गरेका उनले प्रश्न गर्दा कुटाइ खाइन्छ भने पुनः प्रश्न थप्ने बताए।

साफीले प्रदेश सभाका उम्मेदवार भीम पराजुलीलाई पनि पाँच वर्षमा विराटनगरको मेयर भएर के के काम गर्नुभयो भन्ने प्रश्न गरेका थिए। माओवादी केन्द्रका केन्द्रीय सदस्य मोदी र नेपाली कांग्रेसका केन्द्रीय सदस्य समेत रहेका पराजुलीलाई पुनः अर्को कार्यक्रममा साफीले प्रश्न गर्ने बताएका छन्। बिहीबार कटहरी–२ मा हुने कार्यक्रममा उनीहरूलाई पुनः प्रश्न गर्ने साफीले बताए।