गोरखा । माओवादी केन्द्रका अध्यक्ष एवं गोरखा क्षेत्र नम्बर २ का उम्मेदवार पुष्पकमल दाहाल प्रचण्डले गोरखाका धुले सडकहरु पाँच वर्ष भित्र कालोपत्रे हुने बताएका छन् । बिहिवार गोरखाको भच्चेकमा आयोजित चुनावी सभालाई संवोधन गर्दै उनले भने ‘म अहिले धुलो, हिलो र असजिलो बाटोहरु हिँडिराख्याछु, पाँच वर्ष भित्र यी सबै बाटोलाई पिच बनाउने र यहाँको जनतको जिबनमा परिर्वतन ल्याउने छु ।’

बाटो राम्रो भयो भने, चिल्हो भयो भने गाडी सलल् कुद्ने बताउँदै उनले जति गाडी छिटो दौडिन्छ बिकासको गति त्यती छिटो हुने बताए । आर्थिक बिकासको पूर्वाधारकालागि सडक प्रमुख रहेकाले पहिलो प्राथमिकता पालिका, वार्ड, मुख्य सडक कालोपत्रे गर्नेमा दिने उनले बताए ।

देशमा राजनीतिक परिर्वतन सँगै आर्थिक बिकास भने हुन नसकेको उनले बताए । ‘अब आर्थिक क्रान्ती गर्न सकिएन भने राजनीतिक क्रान्ती पनि खतरामा पर्ने भयो’ दाहालले भने ‘जनताको घर आगनमा उज्यालो पु¥याउन सकिएन, आर्थिक क्रान्ती र समृद्धी जोड्न सकिएन ।’ अहिले गठबन्धन दलबिच संविधानको रक्षाका साथै राजनीतिक स्थायीत्व र आर्थिक समृद्धीलाई तिब्र गतीमा अघि बढाउने निर्णय भएको उनले बताए ।

‘मेरो बाँकी जिबन अब आर्थिक क्रान्तिमका निम्ती हुनेछ’ उनले भने ‘देशमा आर्थिक क्रान्ती गर्न गोरखाले त्यसको नेतृत्व गर्छ, गोरखाबाट सुरु गर्ने गरी म यहाँ आएको हुँ ।’ गोरखाको अजिरकोट गाउँपालिकाको भच्चेकलाई राष्ट्रिय मात्र नभई अन्तराष्ट्रिय रुपमा परिचित गन्तब्यको रुपमा बिकास गर्ने र पर्यटकीय केन्द्र बनाउने दाहालले बचन दिए । त्यहाँ उत्पादन भएको चिया, अलैँची देशभर बिक्री गर्ने, शिक्षा स्वास्थ्य, रोजगारीको सिर्जना गर्ने उनले बताए ।

संविधान सभा बिघटन मात्र नभई राष्ट्रपतिले नागरिकता बिधेयक प्रमाणिकरण नगर्नुपनि संविधानको उलंघनको नमुना भएको माओवादी केन्द्रका अध्यक्ष दाहालले बताए । ‘संविधान र लोकतन्त्र बिरोधी प्रवृत्तीले टाउको उठाउने खतरा छ’ उनले भने ‘मंसिर ४ गते प्रतिगमनलाई परास्त गर्नुपर्छ ।’

गठबन्धन भित्रैकै नेपाली कांग्रेसका नेता कार्यकर्तालाई लक्षित गर्दै उनले १२ बुँदे समझदारी नै जय नेपाल र लाल सलाम सँगै रहेको स्मरण गराए । मनमा कतै द्वविधा छ भने कसैले त्यो राख्न जरुरी नभएको बताउँदै उनले भने ‘सम्झौता हुने नै दुई युद्धरत पक्षबिच हो, ठुला परिर्वतन ल्याउन भुमिका तिनैको हुन्छ, यो गठबन्धन चुनावका लागि मात्र होइन, विकास र संवृद्धिका लागि पनि हो ।’