चितवन । यसपटकको प्रतिनिधिसभा सदस्य पदका लागि चितवनका दुई निर्वाचन क्षेत्रबाट दुई कलाकार चुनावी मैदानमा छन् । क्षेत्र नं १ बाट रत्ननगर–९, मोहनाका लोक तथा दोहोरी गायक मिलन लामा (विष्णु) र क्षेत्र नं ३ बाट भरतपुर–२, क्षेत्रपुरका स्थायीवासी लोक, आधुनिक एवं पप गायक हरि योञ्जन । यी दुवैजना तामाङ समुदायबाट प्रतिनिधित्व गर्दै प्रतिनिधिसभामा जाने तयारीमा छन् ।

तर, उमेदवारी दिनुमा यी दुई कलाकारको योजना र उद्देश्य भने नितान्त फरक छ । ‘कृष्णभीरमा जाम’ गीतबाट नेपाली सांगीतिक क्षेत्रमा औपचारिकरुपमा पाइला टेकेका गायक मिलन सामाजिक काम गर्नकै लागि र समाज परिवर्तनको योजना बोकेर प्रतिनिधिसभामा पुग्ने सोचमा छन् ।

लोक तथा दोहोरी गीत–संगीतमा लागेका कलाकारहरुको छाता संस्था राष्ट्रिय लोक तथा दोहोरी गीत प्रतिष्ठान, नेपालमा समेत राजनीतिक आस्था नदेखाएका गायक लामा हालसम्म कुनै पनि दलमा नदेखिएका स्वतन्त्र व्यक्ति हुन् ।

तर, हरि योञ्जन भने कम्युनिस्ट विचार बोकेर हिँडेका कलाकार हुन् । दर्जनौँ गीत गाएर आफूलाई स्थापित कलाकार बनाउन सफल योञ्जनको केही वर्ष पहिले प्रकाशित ‘ओए, ओए सिम्रन’ बोलको गीत बहुचर्चित गीत हो ।

लोकसंगीतमा आधुनिक तथा पप गायकका रुपमा परिचय बनाउन सफल उनी हाल नेकपा माओवादी केन्द्रनिकटको जनसांस्कृतिक महासंघको केन्द्रीय प्राज्ञिक परिषद् सदस्य हुन् । तर, उनले कांग्रेस–माओवादीसहितको गठबन्धन दलविरूद्ध उमेदवारी दिएका हुन् । क्षेत्र नं ३ को निर्वाचन जितेर सांसद् बन्नभन्दा पनि आफ्नै पार्टी नेतृत्वको निर्णयमा चित्त बुझाउन नसकेपछि उनले उमेदवारी दिएको बताउँदै आएका छन् ।

रत्ननगर घर भएका गायक तथा सर्जक मिलन लामाले चुनावी घरदैलो अभियानलाई तीव्र बनाइरहँदा भरतपुरका अर्का गायक तथा संगीतकार योञ्जन भने घरदैलोमा निस्किएका छैनन् । ‘मलाई चुनाव जित्नु र हार्नुसँग कुनै सरोकार छैन, केवल माओवादी पार्टीभित्र परिवारवाद र पैसामुखी प्रवृत्ति बढ्दै गएपछि त्यसका विरूद्ध उमेदवारी दिएको हुँ’, उनी भन्छन् ।

यसअघि चितवन क्षेत्र नं १ मा नेकपा एमालेले जितेको थियो भने क्षेत्र नं ३ माओवादी केन्द्रले जितेको क्षेत्र हो । यसपटक पाँच दलीय गठबन्धन भएकोले क्षेत्र नं १ मा दलगतरुपमा सत्ता गठबन्धनसहितको कांग्रेस र नेकपा एमालेबीच प्रतिस्पर्धा हुँदैछ । क्षेत्र नं ३ मा भने सत्ता गठबन्धनसहित नेकपा माओवादी केन्द्रका डा। भोजराज अधिकारी, राप्रपाका एकल उमेदवार विक्रम पाण्डे र नेपाली कांग्रेसका नेताद्वय दिनेश कोइराला र जगन्नाथ पौडेललगायत चुनावी मैदानमा छन् ।

यसबाहेक पनि चितवन क्षेत्र नं १ मा दलीय तथा स्वतन्त्र गरी १९ जना र २ मा दलीय तथा स्वतन्त्र गरी २० जना प्रतिनिधिसभा निर्वाचनमा उमेदवारका रुपमा सहभागी भएका छन् । मिलन र हरिजस्तै तीनवटै निर्वाचन क्षेत्रबाट स्वतन्त्र उमेदवारी दिएका नेताहरु कसैको चुनावी प्रचारप्रसार आक्रामकरुपमा अगाडि बढेको छ भने कुनै उमेदवार गुमनाम छन् । चितवनपोष्ट दैनिकबाट