सजना तिमल्सिना, काठमाडौँ । अघिल्ला निर्वाचनको तुलनामा यस पटकको सङ्घीय निर्वाचनमा स्वतन्त्र उम्मेद्वारी दिन चाहनेहरू बढेका छन् । सत्ता पक्ष र प्रतिपक्षी दलका आ–आफ्ना उम्मेद्वार टुङ्गो लाग्दा टिकट नपाएर असन्तुष्ट व्यक्ति पनि बागी उठ्ने तयारीमा छन् ।

यस्तो अवस्थामा कस्ता उम्मेद्वारलाई निर्वाचित गराउने ? मतदाताहरूले भने पार्टी भन्दा व्यक्ति रोज्ने विचार गरेका छन् । दलबाट उम्मेद्वार छनोट भएका अधिकांश दोहोरिएका छन् भने राजनीतिक भागवण्डाका कारण कतिपय नेताहरूले निर्वाचन क्षेत्र फेरबदलसमेत गरेका छन् ।

मतदाताहरू यसअघि ती नेताले निर्वाचन क्षेत्रमा गरेको काम र राष्ट्रिय राजनितिमा खेलेको भूमिकाको मूल्याङ्कन गर्दै मत दिने तयारीमा छन् । तर, कतिपय भने व्यक्तिभन्दा पार्टीकै उम्मेद्वार छान्ने तयारीमा रहेका छन् ।

आफूले पटक–पटक गरेको मतदानकै माध्यमबाट व्यवस्था परिवर्तन भएपनि नागरिकले परिवर्तन महशुस गर्न नपाएको बताउनेहरू पनि उत्तिकै छन् । उनीहरू भने ‘नो भोट’ अर्थात कसैलाई मत दिन्न भन्ने व्यवस्था पनि हुनुपर्ने माग गर्छन् ।

गत वैशाखमा भएको स्थानीय तह निर्वाचनबाट केही स्वतन्त्रहरूले जित निकाले भने कतै पार्टी भन्दा राम्रो व्यक्ति हेरेको पाइयो । राजनीति शास्त्रका प्राध्यापक मनोहर पराजुली नागरिक तहमा राजनीतिक चेतनाको स्तर बढ्दै गएकाले पार्टी भन्दा उम्मेद्वार, उसको इमान्दारीता र उठाएका एजेण्डा हेर्नुपर्ने बताउनुहुन्छ ।

आज मनोनयन दर्ता भएपनि मत दिनको लागि नागरिकसँग अझै ४२ दिन बाँकी छ । यो बीचमा आफ्ना क्षेत्रमा उठेका सबै उम्मेद्वारको एजेण्डा सुनेर, बुझेर योग्य प्रतिनिधि छनोट गर्नमा नागरिकले ध्यान दिनुपर्ने जानकारहरूको सुझाव छ ।