चिस्यान केन्द्र

चिस्यान केन्द्र बनेपछि किसानलाई सहज

सिआईएन

८, आश्विन २०७९

सजना तिमल्सिना, काठमाडौँ । पछिल्लो समय कोल्ड स्टोर अर्थात् चिस्यान केन्द्र निर्माणको क्रम बढेको छ । हाल देशभर साना–ठूला गरी ५० वटा चिस्यान केन्द्र छन् । तर, ती कुनै पनि पूर्ण क्षमतामा सञ्चालनमा छैनन् । कृषि तथा पशुपन्छी मन्त्रालयका अनुसार देशभरका ४० वटा चिस्यान केन्द्रले सरकारबाट विद्युत महशुलमा ५० प्रतिशत छुट लिईरहेका छन् ।

आफ्नो ठाउँमा चिस्यान केन्द्र बनेपछि स्थानीय किसान पनि उत्साही छन् । देश सङ्घीयतामा जानु अघि २०७४ सालसम्ममा तत्कालिन कृषि निर्देशनालयले २४ वटा चिस्यान केन्द्र निर्माणको लागि सिफारिस गरेको थियो । अहिले भने देशभर ४० वटा चिस्यान केन्द्रलाई सरकारले विद्युत महशुलमा ५० प्रतिशत छुट दिइरहेको छ । जिल्लामा उत्पादन भएका बाली, पशुजन्य पदार्थ, माछा, तरकारी, फलफूल आदि भण्डारणको लागि चिस्यान केन्द्र गृह निर्माण गरिएको हो ।

कृषि विज्ञ घनश्याम भण्डारी, सरकारले किसानलाई व्यावसायिक उत्पादनतर्फ आकर्षित गर्न र अरु देशबाट विउ आयात गर्नुपर्ने अवस्था हटाउन पनि शीत भण्डार निर्माण गर्नुपर्नेमा जोड दिनुहुन्छ । तर, कृषि तथा पशुपन्छी विकास मन्त्रालयअन्तर्गतको कृषि विभागले आ.व. २०७८÷७९ मा देशैभरिका शीत भण्डारबारे गरेको अध्ययनले शीत भण्डारमा राख्ने कृषिजन्य वस्तुको कमी रहेको औँल्याएको छ ।चिस्यान केन्द्र निर्माणसँगै कृषिजन्य उत्पादन वृद्धिमा पनि जोड दिनुपर्ने विज्ञहरू बताउँछन् ।