देवघाट । हिन्दु धर्मावलम्बीहरुको महत्वपूर्ण धार्मिक तीर्थस्थल देवघाटधाम पहिरोको जोखिममा परेको छ । देवघाटको बेणी संगमस्थल नजिक त्रिशूली नदीतर्फ सुख्खा पहिरो जान थालेपछि देवघाटधाम जोखिममा परेको हो ।

विनाशकारी भूकम्प पश्चात पहिरो जान सुरु भएको देवघाटधाममा पटक पटक पहिरो खस्दै आएको छ । देवघाटको वेणी संगम नजिकै त्रिशूली नदीतर्फको भागबाट सुख्खा पहिरो जान थालेपछि यहाँ १० रोपनीभन्दा बढी जमिन तथा आठ वटा कुटीमा पूर्णक्षति पुगिसकेको छ । पुनः आज बिहान गएको सुख्खा पहिरोका कारण वेणी संगममा स्नान गर्न जाने पदमार्ग नै बन्द भएको देवघाट क्षेत्र विकास समितिका अध्यक्ष बद्रिप्रसाद अधिकारीले जानकारी दिनुभयो ।

‘सुख्खा माटो निरन्तर खसिरहेको छ,उहाँले भन्नुभयो’,मानविय दुर्घटना हुनसक्ने जोखिमले क्षेत्र विकास समितिले बाटो बन्द भएको बोर्ड नै टाँसेको छ ।’

देवघाट वेणीमा स्नानका लागि जान क्षेत्र विकास समिति र स्थानीय सरकारले निर्माण गरेको रेलिङ सहितको पक्की संरचना नै पहिरोले भत्काएर त्रिशूलीमा पु¥याएको अधिकारीले बताउनुभयो ।

सोह्र श्राद्धको समयमा देवघाटमा श्राद्ध गर्न आउने भक्तजनहरुलाई समस्या भएको उहाँले बताउनुभयो । उहाँले पहिरो ठूलो खसेको र यसको दिर्घकालिन समस्या समाधान गर्नुपर्ने भएकाले प्रदेश र केन्द्र सरकारसंग बजेटका लागि आग्रह गरिएको बताउनुभयो ।

त्रिशूली नदीको किनारमा चट्टानी ढुंगा भए पनि माथिल्लो तहमा बलौटे माटो हुँदा यहाँ पटक पटक पहिरो जान थालेको देवघाट गाँउपालिका वडा नम्वर ५ का वडाध्यक्ष पूर्णबहादुर कुँवरले बताउनुभयो । यो बाटो हुँदै दैनिक सयौं तिर्थयात्री वेणिसंगम जाने गरेकोमा अव व्यवस्थित मर्मत नगरेसम्म सूचारु गर्न नसकिने उहाँको भनाई छ । देवघाटमा रहेको गलेश्वर आश्रम सहित यहाँको पुरातात्विक स्थल संरक्षणमा सबैको साथ आवश्यक रहेको उहाँले बताउनुभयो ।

प्रसिद्ध धार्मिक क्षेत्र नै खतरामा पर्न थालेपछि स्थानीयवासी चिन्तित बन्दै गएका छन् । देवघाटधाम नै संकटमा पर्ने अवस्था आइसक्दा समेत कसैको चासो नपुग्दा स्थानीय रुष्ट छन् । पहिरो नियन्त्रणका लागि जिल्लाबाट प्रतिनिधित्व गर्ने प्रदेश तथा संघीय सांसद र नेताहरुलाई अनुरोध गर्दा पनि उनीहरुले कुनै चासो नदिएको गलेश्वर आश्रमका पीठाधीश्वर अनन्तश्रीविभूषित महामण्डलेश्वर स्वामी आत्मानन्द गिरिजी  महाराजले बताउनुभयो ।

‘आश्रमको कम्पाउण्डसम्मै पहिरो आइसक्यो,उहाँले भन्नुभयो’, रातमा ठूलो पानी आउँदा हामीलाई पनि निन्द्रा नलाग्ने भइसक्यो ।’ देवघाटधामको इतिहाँस बोकेको गलेश्वर आश्रमको संरक्षणमा राज्यले चासो नदिएको उहाँको गुनासो छ । पाँचबर्ष अघि लखौं खर्च गरेर डिपिआर निर्माण गरिएको भएपनि कुनैपनि सरकारले बजेट विनियोजन नगरेको पीठाधीश ज्ञानानन्द सरस्वतीजीले बताउनुभयो ।