मनकामना मन्दिर

मनकामना मन्दिरमा भारतीय भक्तजनको लर्को, एकैदिन १४ सय आईपुगे

इच्छाकामना न्युज

४, आश्विन २०७९

मनकामना मन्दिरमा भारतीय भक्तजनको लर्को, एकैदिन १४ सय आईपुगे

मनकामना । गोरखाको प्रसिद्ध धार्मिक स्थल मनकामना मन्दिरमा आईतबार एकैदिन करिब १४ सय भारतीय भक्तजन पुगेका छन् । मनकामना केबलकार भएर उनीहरु मनकामना मन्दिरको दर्शन गर्न गोरखा आएका हुन् ।

‘यो सिजनमा भारतीय भक्तजन धेरै नै आउनुहुन्छ, आईतवार अन्य दिन भन्दा धेरै देखिएको छ’, मनकामना केबलकारका स्टेशन म्यानेजर उज्वल शेरचनले भने, ‘आईतवार करिब एक हजार चार सय जना भारतीय भक्तजन केबलकार भएर मनकामना पुगेका छन् ।’

मर्मतका क्रममा करिब एक महिना बन्द रहेको मनकामना केबलकार भदौ २५ गतेदेखि संचालनमा आएको हो । अहिले दैनिक एक हजार भारतीय भक्तजन आउने गरेका छन् । सोह«श्राद्ध सुरु भएकाले मनकामना मन्दिर जाने नेपाली भक्तजन भने कम छन् । ‘अहिले दैनिक एक हजार भारतीय भक्तजन आएका छन् आईतवार अन्य दिन भन्दा धेरै भए’, स्टेशन म्यानेजर शेरचनले भने ।

भारतको बिभिन्न ठाउँमा मनकामनामा दर्शन गर्न भक्तजन आएका छन् । मनकामना मन्दिरमा वार्षिक आउने भक्तजन मध्ये करिब २० प्रतिशत भारतीय हुने गरेको केबलकारको तथ्याङ्क छ । मनकामनाप्रति आस्था र विश्वास धेरै भएको, भारतमा पनि मनकामनाको महत्वका बारेमा चर्चा हुने गरेकाले मनकामना मन्दिर दर्शन गर्न आउनेको संख्या हरेक वर्ष बढ्दो छ ।

नौरथा सुरु भएसँगै नेपाली भक्तजनको चाप पनि बढ्ने मनकामना दर्शन प्रालिले जनाएको छ । बिजया दशमीको समयमा तीनदिन मात्रै मनकामना केबलकार बन्द हुने दर्शन प्रालिले जनाएको छ । दरौदी दैनिकबाट