इच्छाकामना विशेष

इच्छाकामनाको हपनी गाउँ पनि सुरक्षित खानेपानीयुक्त र पूर्ण सरसफाई उन्मुख गाउँ घोषणा

इच्छाकामना न्युज

९, भाद्र २०७९

इच्छाकामनाको हपनी गाउँ पनि सुरक्षित खानेपानीयुक्त र पूर्ण सरसफाई उन्मुख गाउँ घोषणा

कुरिनटार । चितवनको इच्छाकामना २ स्थित हपनी गाउँलाई सुरक्षित खानेपानीयुक्त र पूर्ण सरसफाई उन्मुख गाउँ घोषणा गरिएको छ । बुधबार एक कार्यक्रमका बिच गाउँपालिका अध्यक्ष दान बहादुर गुरुङले हपनी गाउँलाई सुरक्षित खानेपानीयुक्त र पूर्ण सरसफाई उन्मुख गाउँ घोषणा गर्नुभएको हो ।

गाउँपालिका अध्यक्ष दान बहादुर गुरुङ प्रमुख अतिथि रहेको उक्त कार्यक्रममा उपाध्यक्ष माया सिलवाल, कार्यक्रमका सहयोगी अन्तर्राष्ट्रिय गैरसरकारी संस्था भिभा कोन अग्वा(भिसिए) वेल्ट हंगर हिल्फे(डब्लुएचएच) र नेपाल ग्रामीण पुननिर्माण संस्थ(आरएनएन)को प्रतिनिधिहरुको सहभागिता रहेका थिए । वडाध्यक्ष पञ्च बहादुर चेपाङको सभापतित्वमा घोषणा कार्यक्रम सम्पन्न भएको हो ।

एक घर एक धारा, सौचालय निर्माण ,बाटोघाटो सरसफाई र हरेक घरमा खानेपानी फिल्टर रहेपछि हपनी गाउँलाई सुरक्षित खानेपानीयुक्त र पूर्ण सरसफाई उन्मुख गाउँ घोषणा गरिएको वडाध्यक्ष पञ्च बहादुर चेपाङले बताउनुभयो । ३ किलोमिटर टाढाबाट बस्तीमा पानी ल्याएको उहाँले बताउनुभयो ।

६४ घर रहेको हपनीमा गाउँपालिका र अन्तर्राष्ट्रिय गैरसरकारी संस्था भिभा कोन अग्वा(भिसिए) वेल्ट हंगर हिल्फे(डब्लुएचएच)को आर्थिक सहयोगमा नेपाल ग्रामीण पुननिर्माण संस्थ(आरएनएन)ले कार्यक्रम संचालन गरिएको हो ।

यसैबिच यस अघि थापथली गाउँलाई पनि सुरक्षित खानेपानीयुक्त र पूर्ण सरसफाई उन्मुख गाउँ घोषणा गरिसकेको छ । सबै टोलमा कार्यक्रम सञ्चालन गर्ने वडाध्यक्ष चेपाङले बताउनुभयो । केही गाउँहरुमा कार्यक्रम सञ्चालन भइरहेको उहाँले बताउनुभयो ।